بنجائی وزیر خزانہ شوکت ترین نا انڈسٹریل اینڈ ایکسپورٹ ورکشاپ آن تران

اسلام آباد۔ 24 فروری (اے پی پی) بنجائی وزیر خزانہ شوکت ترین پارینے کہ وزیراعظم عمران خان نا کماشی ٹی حکومت اولیکو دے آن زرگزران ءِ بحال کننگ آ چکار کرے، بھاز خواری اٹ زرگزران نا سمتءِ سہی کننگا، داسال زرگزرانی نمو 4.5 درسد نا نیام اٹ سلنگ نا گمان ءِ۔ داخیال آتا درشانی ءِ او پنچ شنبے نادے آ انڈسٹریل اینڈ ایکسپورٹ ورکشاپ آن تران کرسا کرے۔ بنجائی وزیر پارے کہ پاکستان 60 نا دہائی ٹی ایشیا نا چارمیکو بھلا زرگزران ئسک، ہرانا سوب سوگو ڈٹ بندی ئسک، وخت اتون اینو پاکستان ایشیا نا اولیکو بیست ملک آتیٹی ہم سلتنے۔ اوپارے کہ وزیراعظم عمران خان نا کماشی ٹی حکومت تینا بناءِ زرگزران ءِ بحال کننگ نا کوشست آتیان کرے۔بھاز خواری اٹ زرگزران نا سمت ءِ سہی کننگا دا سال زرگزرانی نمو نا کچ چار ءُ نیم آن پنچ درسد نا نیام اٹ سلنگ نا گمان ءِ۔ اوپارے کہ نن سیونگ ریٹ ءِ گچین کننگ آ چکار کننگ اُن، ہراڑکن ننے ٹیکنالوجی نا کاریم اٹ اتنگ آن حکومتی کٹیا ءِ ودفوئی ءِ۔ اوپارے کہ پائیدار شونداری کن ٹیکس ٹو جی ڈی ریشو ءِ ساڑی آ 10 درسد آن 20 درسد آ دننگ ءِ۔ اوپارے کہ ننے آئی ٹی و سیل و سوات نا بشخ آتیا زرکاری کروئی ءِ، ننے تینا ایکسپورٹ حکمت عملی ءِ ہم گچین کننگ ءِ، ننے تینا صنعتی و کشاری پیدوار ءِ ہم ودفنگ نا گرج ءِ۔ اوپارے کہ ننے غذائی رکھ ءِ پک کننگ کن فصل آتا پیدوار ءِ ودفوئی ءِ۔ اوپارے کہ زرکاری کن سازگار چاگڑدنا فراوانی کن چندی گام گیج کننگانے، اقتصادی شونداری نا بھرم تے شیفکو تپہ اسکان سرکننگ کن گام گیج کننگ اُن۔ اوپارے کہ سرسہب پاکستان پروگرام، سرسہب ورنا، احساس، ہیلتھ کارڈ کون آ گام گیج آتے کرینن، لس بندغ نا راجی رکھ آ خصوصی چکار تننگ انگ ءِ، ننے اقتصادی شونداری نا چرجوئی ءِ برقرار تخوئی مریک۔