راج اٹ جان جوڑ و تعلیم تون اوار راجی ویل آتا بابت آگاہی ودی کننگ کن کمیونٹی ورکرآتا لائخی تیان فائدہ ہرفنگ نا گرج ءِ، صدر مملکت ڈاکٹر عارف علوی نا دود آن تران

اسلام آباد۔ 24 فروری (اے پی پی) صدر مملکت ڈاکٹر عارف علوی پارینے کہ راج اٹ جان جوڑ و تعلیم تون اوار راجی ویل آتا بابت آگاہی ودی کننگ کن کمیونٹی ورکرآتے اسہ پلیٹ فارم اسے آ یکجا کرسا اوفتا لائخی تیان فائدہ ہرفنگ نا گرج ءِ، جان جوڑی، تعلیم تون اوار راجی خذمت آتا فراوانی ریاست مدینہ نا وژن ءِ و پاکستان تحریک انصاف نا ساڑی آ حکومت ہندا وژن آ عمل کننگ ءِ۔ داخیال آتا درشانی ءِ او پنچ شنبے نادے آ جان جوڑی آسراتی پروگرا م نا رداٹ راجی جان جوڑی نا رکھ ءِ سوگو کننگ نا بابت دود آن تران کرسا کرے۔ دادود انا بست وبند ءِ ہیلتھ سروسز اکیڈمی و جرمنی ناادارہ جی آئی زیڈ کریسر۔ صدر مملکت ڈاکٹر عارف علوی پارے کہ جرمنی نا جان جوڑی نا آسراتی فراوانی نا بابت تاریخی و متکن آزموندہ ءِ ، پاکستان تحریک انصاف نا جوڑ کننگ نا وخت آ ہرا منشور ءِ تیار کننگا اوٹی تعلیم و جان جوڑی نا بشخ ءِ اولیت تننگا انتئے کہ راجی خذمت آتا بابت جان جوڑی و تعلیم نا فراوانی ریاست مدینہ نا وژن ئسک، ہراقومک جان جوڑی و تعلیم ءِ اولیت تسر ہموقومک شون ہلکر۔ اوپارے کہ جان جوڑی آسراتی کارڈ گچین ءُ گام اسے، خیبرپختونخوا و پنجاب اٹی شاری تے جان جوڑی آسراتی کارڈ فراوان کننگانے و سندھ و بلوچستان اٹی ہم زوت دا آسراتی ءِ فراوان کننگک، داکارڈ آن مچ آ کمیونٹی نا انشورنس مریک، داکارڈ انا کاریم اٹ اتنگ نا جاچ ءِ ہلنگ ہم المی ءِ، ہیلتھ سروسز اکیڈمی ءِ دانا زمواری تننگانے۔ اوپارے کہ جان جوڑی کارڈ اٹ کرپشن نا ہچ ءُ گمان اس اف۔ اوپارے کہ آن لائن تعلیم اڑزآن ءِ و آن لائن وڑاٹ مر مر انگا علاقہ غاتیٹی تعلیم فراوان کننگ مریک، ہنداوڑ جان جوڑی نا بشخ اٹی پوسکن آ ذریعہ ءِ کاریم اٹ اتنگ انگ ءِ۔ اوپاکستان اٹی جان جوڑی نا بشخ اٹی کمکاری آ جرمن حکومت نا منتواری ءِ ہرفے۔ داوخت آ دود آن تران کرسا پارلیمانی سیکرٹری قومی جان جوڑی ڈاکٹر نوشین حامد پارے کہ صوبہ خیبرپختونخوا و پنجاب اٹی یونیورسل ہیلتھ کوریج نا آسراتی ءِ فراوان کننگ انگ ءِ، دا گام آن جان جوڑی نا آسراتی تا فراوانی نا آب اٹ گچینی بسنے، بھاز زیات آبادی ءِ جان جوڑی نا آسراتی تا اسہ وڑ فراوانی بھلو چیلنج اسے۔ اوپارے کہ جرمن ڈویلپمنٹ کارپوریشن (جی آئی زیڈ) پاکستان نا بھلا شریدار ءِ، الس اٹ جان جوڑی نا دوئی آسراتی تا بابت آگاہی ودی کننگ اہم ءِ۔ جرمن سفارت خانہ نا ڈپٹی ہیڈ آف مشن ڈاکٹر فلپ پارے کہ جرمنی پاکستان اٹ راجی رکھ اکن جان جوڑی آسراتی پروگرام اٹ پبی کمک کننگ ءِ۔