اسلام آباد۔ 24 فروری (اے پی پی) صدر مملکت ڈاکٹر عارف علوی بینکنگ محتسب نا کنڈآن سال 2021اٹی بینکنگ فراڈ نا بابت 37،000 آن زیات کیس آتیٹی کھاتہ دار آتے 709 ملین روپئی نا ریلیف فراوان کننگ آ است جمی نا درشانی ءِ کرسا بینک صارف آتے انصاف نا ترند رفتار فراوانی ءِ پک کننگ کن محتسب نا فیصلہ غاتیا عملدرآمد نا گرج آ زور شاغانے۔ پاکستان نا بینکنگ محتسب محمد کامران شہزاد پنچ شنبے نادے آ داڑے ایوان صدر اٹی صدر مملکت ڈاکٹر عارف علوی تون اوڑدہی کرے و ادارہ نا سالانہ رپورٹ 2021ءِ پیش کرے۔ اوصدر ءِ بینکنگ محتسب نا ادارہ نا کارکڑد و سرسہبی تیان معلومدار کرے۔ اوپارے کہ پاکستان نا بینکنگ محتسب تدوک آ سال اٹی بینکنگ فراڈ نا بابت 37،000 آن زیات باندات آتیٹی کھاتہ دار آتے 709 ملین روپئی نا ریلیف فراوان کرینے۔ صدر پاکستان نا بینکنگ محتسب نا کارکڑد آ است جمی نا درشانی ءِ کرے و بینک صارف آتے انصاف نا ترند رفتار فراوانی ءِ پک کننگ کن محتسب نا فیصلہ غاتیا عملدرآمد نا گرج آ زور شاغا۔ بینکنگ محتسب حوال اٹی پارے کہ سال 2021اٹی 33،196 پوسکن ءُ غاو دوئی مس وخت اس کہ داکان مست انا سال انا زیر التوا غاوتا کچ 4،168 ءِ۔ جم 37،364 غاوتیان 18،000 آن زیات غاووزیراعظم پاکستان سٹیزن پورٹل نا کمک اٹ دوئی مس۔ اومستی پارے کہ کل 37،364 غاوتیان 25،231 غاوتے دمدستی وڑاٹ مصالحت نا کمک اٹ ایسر کننگا وخت اس کہ 437 غاوتا باقاعدہ سماعت آن پد فیصلہ کننگا۔ صدر محتسب ءِ ادارہ ءِ پین سوگو کننگ اٹ تینا کمکاری نا باور کرفے تانکہ کھاتہ دار آتا غاوتا دمدستی ازالہ ءِ کننگ مرے۔
