ماسکو۔23فروری (اے پی پی): مزن وزیر عمران خان روسی صدر ولادی میر پیوٹن ءِ ھاسیں دعوت ءِ پد ءَ روس ءِ 2 روچی سرکاری تر ءُ تاب ءِ ھاترا ماسکو ءَ پج اتگ۔ مزن وزیر عمران خان ءَ چار شمبے ءَ ادا ائیر پورٹ ءِ پجگ ءِ پد ءَ روس ءِ نائب وزیر ءِ درئی کار ایگور مور گولٹو ءَ وش اتک کت۔ مزن وزیر عمران خان ءَ را گارڈ آف آنر پیش کنگ بوت۔ بنجاھی وزیر مخدوم شاہ محمود قریشی ، چوہدری فواد حسین، اسد عمر، حماد اظہر، مشیرِ تجارت عبدالرزاق داؤد، راجی سلامتی ءِ مشیر معید یوسف ءُ عامر محمود کیانی مزن وزیر ءِ ھمبراہ اتنت۔ روسی صدر ولادی میر پیوٹن ءِ ھاسیں دعوت ءِ پد ءَ مزن وزیر عمران خان روس ءِ 2 روچی سرکاری تر ءُ تاب ءَ کنگ ءَ انت۔ مزن وزیر عمران خان بیست سال ءَ چہ پد اولی پاکستانی مزن وزیر انت کہ آئی ءَ روس ءِ تر ءُ تاب کتگ۔ روس ءِ صدر پیوٹن ءُ مزن وزیر ءِ گند ءُ نند اے تر ءُ تاب ءِ ارزشتی ایں بھر بنت۔ صدر پیوٹن ءَ گوں گند ءُ نند ءَ مزن وزیر عمران خان میاں اوستمانی ءُ پڑ ءِ کار آنی سر ءَ ھیال ریچی کنت۔ گند ءُ نند ءَ روس پاکستان دو نیمگی یکوئی ھاسیں رنگ ءَ ھاٹیگ ءِ شوبگ ءَ گپ ءُ تران کنت۔ اسلاموفوبیا ءُ اوگانستان ءِ جاور ھال آنی سر ءَ چار ءُ بچار کنگ بیت۔ مزن وزیر ماسکو ءَ روس ءِ درستاں چہ مستریں مسیت ءُ اسلامک سنٹر ءِ تر ءُ تاب کنت۔ مزن وزیر عمران خان ءَ گوں ارشتی ایں سروک آں ھوار نائب مزن وزیر، روسی سرمایہ کار ءُ تاجر گند ءُ نند کن اَنت۔ مزن وزیر ءِ روس ءِ تر ءُ تاب ءُ پاکستان ءِ دو نیمگی یکوئی آناں گیش برجم کنت۔
