اسلام آباد۔ 22 فروری (اے پی پی) وزیراعظم عمران خان ورناتیا زور شاغانے کہ او شجرکاری ٹی پبی بشخ ہلیر، ہر خاہوت کم از کم 5 درخت خلے و اوفتا خیالداری ءِ کے، بروک آ چین تیکن دا المی ءِ ، مچ آ دنیا چاگڑدی بدلی نا برخلاف ننا جہد ءِ امنا کرینے۔ داخیال آتا درشانی ءِ او سے شنبے نادے آ پاکستان اٹی اسکاؤٹس نا جہانی دے انا وخت آ ہتم نا شجرکاری مہم 2022 نا بنائی دود آن تران کرسا کرے۔ وزیراعظم پارے کہ اسکاؤٹس ءِ اونا جوڑ مننگ نا جہانی دے انا وخت آ مبارکبادی ایتیوہ۔ بدبختی اٹ پاکستان ہمو 10 ملک آتیٹی اوار ءِ ہرادے موسمیاتی بدلی آن خطرہ مون تروک ءِ، شجرکاری نا کمک اٹ نن تینا بروک آ چین تے رکھ کننگ کینہ واوفتے گچین چاگڑد اس فراوان کننگ کینہ۔ اوورناتیا زور شاغا کہ او شجرکاری مہم اٹی پبی بشخ ہلیر، لمہ و باوہ تینا چناتا آخبت کن دا ویل انا اہمیت ءِ پہہ مریر و ہرخاہوت کم از کم 5 درخت خلے و اوفتا خیالداری ءِ کے۔ ہنداوڑ نن اسل اٹ تینا آخبت نا پرورش ءِ کینہ۔ وزیراعظم پارے کہ اللہ تعالیٰ پاکستان ءِ 12 موسم تسنے، داڑے ہر وڑنا درخت و میوہ غاتا نشوونما مننگ کیک۔ نن اللہ تعالیٰ نا تروک آ نعمت آتا بایدے قدر ءِ کین، نن اللہ تعالیٰ نا نعمت آتا پرواہ ءِ کتون ہنداخاطرآن موسمیاتی بدلی نا عذاب ننے گھیڑ کرینے۔ وزیراعظم پارے کہ اینخو ہتم اٹی 54 کروڑ درخت خلنگ نا ہدف مقرر کننگانے ہراوڑ داکان مست غٹ ہدف آتے دوئی کرین، دافتے ہم کینہ۔ اوپارے کہ ٹین بلین ٹری سونامی ڈٹ آن پاکستان نا چاگڑد گچین مریک، بدبختی اٹ تدوک آ سال تیٹی انگریز آتا خلوک آ جنگل درخت آتے ہم بھس کننگا۔ وزیراعظم شجرکاری مہم نا سرسہبی آ ملک امین اسلم و اونا ٹیم ءِ مبارکبادی تس و پارے کہ موسمیاتی بدلی نا برخلاف ننا جہد نا دنیا معترف ءِ۔ دود آن تران کرسا وزیراعظم نا سلاہکار موسمیاتی بدلی ملک امین اسلم پارے کہ داتم اسکان نن شجرکاری نا بابت غٹ ہدف آتے دوئی کرینن۔ 54 کروڑ نیال خلنگ نا ہدف ءِ دوئی کرینن۔ ہزار آ بندغ آتے شجرکاری آن بلواسطہ و بلاواسطہ روزگار دوئی مسنے۔ اینخو سیزن اٹی ہدف آن 5 ہنداخہ زیات درخت خلینہ۔ اوپارے کہ سعودی عرب تون چاگڑد نا بابت ایم او یو آ دستخط مسنے۔ برطانوی وزیراعظم و ورلڈاکنامک فورم ہم چاگڑد کن پاکستان نا کوشست آتا ستاءِ کرینو۔ اپارے کہ نہہ نیم ہزار سائٹس آ شجرکاری برجاءِ و دانا سرجم آتے نن پبلک کرینن۔ داکان مست وزیراعظم نیال اس خلسا ہتم نا شجرکاری مہم 2022 نا بناءِ کرے۔ داوخت آ بنجائی وزیر تعلیم شفقت محمود وایلوفک ہم ساڑی ئسر۔
