اسلام آباد۔ 22 فروری (اے پی پی) او آئی سی وزراء خارجہ کونسل نا 48 می دیوان نا میڈیا حکمت عملی ءِ گڈیکو دروشم اس تننگا، دا چرجوئی ٹی وزارت خارجہ ٹی سے شنبے نادے آ بڑزکو کہول انا دیوان اس اڈ ہلک۔ دیوان نا کماشی ءِ وزیرخارجہ مخدوم شاہ محمود قریشی و بنجائی وزیر حوالکاری و شینکاری فواد چوہدری ئسک اسیجائی وڑاٹ کریر۔ دیوان اٹی سیکرٹری حوالکاری و شینکاری گودی شاہیرہ شاہد، اسپیشل سیکرٹری خارجہ رضابشیر تارڑ، ترجمان دفتر خارجہ عاصم افتخار، پی آئی او سہیل علی خان، ڈی جی ایکسٹرنل پبلسٹی ونگ عنبرین جان، ایم ڈی اے پی پی مبشر حسن، ایم ڈی پی ٹی وی عامر منظور تون اوار وزارت خارجہ و حوالکاری نا سینئر آفیسر آک بشخ ہلکر۔ وزیر خارجہ ءِ 22/23مارچ آ اسلام آباد اٹی اڈ ہلوک آ او آئی سی وزراء خارجہ کونسل نا 48 می دیوان نا میڈیا حکمت عملی، دارداٹ چست کروک گام گیج و بست وبند آتا بابت سرجم حوال تننگا۔ وزیرخارجہ او آئی سی وزراء خارجہ کونسل نا 48 می دیوان نا بابت مرتب کروک جامع میڈیا سٹریٹجی نا ستاءِ کرے۔ وزیرخارجہ پارے کہ او آئی سی وزراء خارجہ کونسل نا اہم انگا دیوان نا سرسہب اڈتننگ آن پد ، او آئی سی وزرائے خارجہ کونسل نا 48 می باقاعدہ دیوان نا مہمانداری پاکستان کن گمر نا قابل و شرفمندی ناسوب ءِ۔ اوپارے کہ او آئی سی وزراء خارجہ کونسل نا چل ءُ ہشت می دیوان نا اڈتننگ آن ہراڑے مسلم امہ ءِ مون تروک چیلنج آتون مون تننگ و امنائی لائحہ عمل اس طے کننگ نا اسہ روشنا ءُ وارخواہی اس دوبریک، ہموڑے پاکستان اسہ وار ولدا جہانی چکار نا وت مریک۔
