اسلام آباد۔ 22 فروری (اے پی پی) بنجائی وزیر ڈٹ بندی، شونداری، اصلاحات و خصوصی گام گیج اسد عمر پارینے کہ ملک انا آخبت نا ڈٹ بندی کن مردم شماری المی مریک، مردم شماری کن شناختی کارڈ نا شڑت مفک، این سی او سی ٹی پوسکن آ ٹیکنالوجی نا سوب دمدستی زوت انفارمیشن رسینگاکہ۔ داخیال آتا درشانی ءِ او سے شنبے نادے آ پاکستان بیورو آف شماریات اٹی تینا کماشی ٹی دیوان آن تران کرسا کرے۔ دیوان اٹی چیف شماریات ڈاکٹر نعیم ظفر این تھری سینٹر نا بابت حوال تس۔ حوال اٹی پارے کہ اولیکو وار پاکستان اٹ ڈیجیٹل مردم شماری مننگ ءِ۔ صوبائی انتظامیہ تون اواری اٹ ڈیجیٹل مردم شماری نا بابت سلابت کننگا۔ ڈیجور وڑوڈول نا رداٹ مردم شماری داوخت آ دنیا ٹی مننگ ءِ۔ حوال اٹی پاننگاکہ ڈیٹاکلیکشن کن ہراڑے انٹرنیٹ نا آسراتی اف ہموڑے پیپر نا کمک اٹ ڈیٹا یکجا کننگک۔ قومی مردم شماری رابطہ سینٹرنا کماشی ءِ ڈپٹی چیئرمین ڈٹ بندی کمیشن کیک۔ مچ آ پاکستان اٹی 614 مردم شماری سسپورٹ سینٹرز جوڑ کننگانے۔ 250 اُراتا اسہ بلاک اس مریک و ہر بلاک نا رزلٹ جتابریک۔ حوال اٹی چیف شماریات پارے کہ اسہ لکھ بیست ہزار ٹبلٹس ہلنگک۔ دیوان آن تران کرسا بنجائی وزیر اسدعمر پارے کہ چیف شماریات ءِ نیشنل مردم شماری کوارڈی نیشن سینٹر آ مبارکباد ایتیوہ۔ جوان فیصلہ سازی کن جوان ءُ ڈیٹا اسے نا دوئی المی مریک۔ ملک انا آخبت نا ڈٹ بندی کن مردم شماری المی مریک۔ اوپارے کہ پوسکن آ ٹیکنالوجی آن پد ہم مردم شماری وخت اس دہ و وخت اس پانزدہ سال آن پد مریک۔ مردم شماری آن پد دوبہ خلنگ بناکیک۔ داخہ اہم کاریم کن المی ءِ کہ دنیا ٹی پوسکن آ ٹیکنالوجی ءِ کاریم اٹ اتین۔ اسد عمر پارے کہ این سی او سی ٹی پوسکن آ ٹیکنالوجی نا سوب آن دمدستی زوت انفارمیشن رسینگاکہ۔ نیشنل کوآرڈی نیشن سینٹر اٹی بنجا و صوبائی اکائیک اسہ جاگہ غا تولرہ۔ انت کہ انفارمیشن اس مرے اودے میڈیا تون شیئر کیر ہچ ءُ گڑاسے ڈکھنگپ ۔ بنجائی وزیر پارے کہ پت اٹ فضا اخس کہ گچین مریک ملک اکن ہموخس زیات گچین مریک۔ پارلیمان ءِ دامردم شماری نا بابت پت اٹ ہلوئی مریک۔ دا مردم شماری ٹی فوج انا کڑد سیکورٹی نا کڑد مریک، داڑآ کم و ود دہ ارب خڑچ انا سافٹ ویئر ہارڈویئر اس ہلنگک۔ داسال مئی جون اٹی پائلٹ ٹیسٹ مریک۔ مردم شماری کن شناختی کارڈ نا شڑت مفک۔ آئی ٹی نا غٹ ادارہ غاک دامردم شماری نا عمل اٹ اوار ءُ۔ اوپارے کہ دا عمل اٹ ہیکنگ نا ہچ ءُ خطرہ اس اف۔ 98 درسد ڈیجیٹل عمل مریک۔ مردم شماری نا عمل آ سنجیدہ اعتراض چست کننگا تو اونا ورندی ءِ ایتنہ۔ ننا الس ءِ گلہ مریک دیوانی مقدمہ غاتیٹی فیصلہ مفک۔ اخس کہ تاریخ اپوزیشن تس ہموخس اسہ عدالت اس ہم تتنے۔ نواز و زرداری تون ہیت داسہ بلاول و مریم آ بسنے۔ تاریخ آتے بھاز خنانن دافتے ہم ہرنہ۔
