اسلام آباد۔ 22 فروری (اے پی پی) وزیراعظم عمران خان پارینے کہ پاکستان جہانی کہول آ اسہ پڑک اسے نا ہم بشخ اف، پاکستان روس اتون گچین و غٹ ملک آتون واپاری تعلقداری تا خواہندار ءِ، نن خوانہ کہ یوکرین نا ویل پرامن وڑاٹ ایسر مرے، ای طاقت نا جاگہ غا مذاکرات اٹ ویل آتے ایسر کننگ نا قائل مسونٹ، پاکستان و بھارت نا نیام اٹ اسل ویل کشمیر نا ءِ، پدتموک ملک آتا پیسہ غاتے پدی تننگ کن شون ہلوک ملک آک کانود اس بایدے جوڑ کیر، دولت نا بے انصافی اٹ بشخنگ و منی لانڈرنگ بھاز بھلو چیلنج اسے، ہراتم اسکان نم تینا ردینک آتیان ہیل کپیرے مون آ ہِننگ کپیرے۔ داخیال آتا درشانی ءِ او سے شنبے نا دے آ روسی ٹی وی آرٹی ءِ تروک آ انٹرویو ٹی کرے۔ وزیراعظم عمران خان پارے کہ انسان مدام خداءِ پٹِک ، ایلوانسان تا گچینی کن سجفنگ ننا زمواری ءِ، انسان ءِ بھاز انگا چیلنج مون تروک ءِ، اوپارے کہ چاگڑدی کچٹی اسہ بھاز بھلو چیلنج اسے ، اونا سوب آن دنیا زہمی مننگ ءِ، پاکستان چاگڑدی کچٹی تون مون تننگ کن گام گیج کننگ ءِ۔ اسہ سوج اسے نا ورندی ٹی وزیراعظم پارے کہ دولت نا بے انصافی اٹ بشخنگ و منی لانڈرنگ بھاز بھلو چیلنج اسے، حکمران تا کرپشن و پیسہ غاتا گدریفنگ آن پدتموک ملک آتے پین مشکل آتون مون تروئی تمک، حکمران تا کرپشن آن ادارہ غاک بھس مریرہ، اوپارے کہ منی لانڈرنگ و بے انصافی اٹ بشخنگ آن نیزگاری ٹی ودکی مریک، ملک انا پیسہ غاتے پیشن گدریفنگ بھسکاری آنبار ءِ ، اوزور شاغا کہ دا چرجوئی ٹی پدتموک ملک آتا پیسہ غاتے پدی تننگ کن شون ہلوک ملک آک بایدے کانود اس جوڑ کیر۔ اوپارے کہ مستین اٹ سرد جنگ آن مچ آ دنیا ءِ تینا پلویڑ اٹی ہلکوسس ولے، پاکستان جہانی کہول آ اسہ پڑک اسے نا ہم بشخ اف، البتہ او پارے کہ مستین اٹ پاکستان امریکی پڑک نا بشخ ئسک۔ اسہ پین سوج اسے نا ورندی ٹی اوپارے کہ نن غٹ ملک آتون واپاری تعلقداری خوانہ، اوغان مہاجر آتے پاکستان پناہ تس، پیشن نا امداد اسہ لعنت اسے، داڑکن ملک آتے غلط فیصلہ کروئی تمک، ہراتم اسکان نم تینا ردینک آتیان ہیل کپیرے مون آ ہِننگ کپیرے۔ اسہ سوج اسے ناورندی ٹی وزیراعظم پارے کہ کورونا نا سوب آن مچ آ دنیا نا زرگزران ءِ زور اس لگانے، وزیراعظم عمران خان پارے کہ نن خوانہ کہ یوکرین نا ویل پرامن وڑاٹ ایسر مرے، ای واک انا جاگہ غا مذاکرات اٹ ویل آتے ایسر کننگ نا قائل مسونٹ۔ تینا دورہ روس انا رداٹ وزیراعظم پارے کہ پاکستان روس اتون گچین تعلقداری تا خواہندار ءِ۔ اواسہ سوج اسے نا ورندی ٹی پارے کہ بھارت تینا مخلوق ءِ نیزگاری آن کشنگ کن گام گیج کے، پاکستان و بھارت نا نیام اٹ اسل ویل کشمیر نا ءِ، ہراتم اقتدار ءِ سنبھالان تو بھارت ءِ مذاکرات نا سلہ خلکن، بھارت اٹی فاشٹ نظریہ تخوک آ پارٹی نا حکومت ءِ۔ اوپارے کہ نن خوانہ کہ ایران آ ن پابندیک چٹر، نیزگاری نا چٹفنگ کن ننے چین آن ہیل کروئی مریک، ایلو انسان تا گچینی کن سجفنگ ننا زمواری ءِ۔
