اسلام آباد۔ 21 فروری (اے پی پی) جرمنی نا وزیر خارجہ اینا لینا بیرباک تینا پاکستانی ہم منصب مخدوم شاہ محمود قریشی تون ٹیل فون آ رابطہ کرے۔ دوشنبے نادے آ ترجمان دفترخارجہ نا رداٹ ہڑتوم آ وزیر خارجہ غاک ہڑتوم آ کنڈآتا تعلقداری تتون اوار اوار اہم علاقائی امور آ گپ وتران کریر۔ وزیرخارجہ تینا جرمن ہم منصب ءِ بطور وزیرخارجہ زمواری تے سنبھالنگ آ مبارکبادی تس و پارے کہ جرمنی پاکستان نا قدر انا قابل،متکن آ شریدار ءِ، پاکستان جرمنی تون غٹ جہت خاص وڑاٹ واپار، زرکاری ، توانائی، موسمیاتی بدلی نا بشخ آتیٹی ہڑتوم آ کنڈآتا تعلقداری تے پین مون آ دننگ کن سنبرینگوک ءِ۔ وزیرخارجہ اوغانستان اٹی امن و سوگوی کن جہانی برادری نا کوشست آتا رداٹ پاکستان نا مخ تفی نا عزم انا درشانی ءِ کرے۔ وزیرخارجہ اوغانستان آن پیش تمنگ نا عمل اٹ پاکستان نا کنڈآن تروک آ کمکاری آن جرمن ہم منصب ءِ معلومدار کرے و پارے کہ پاکستان داتم اسکان 90 ہزار آن زیات بندغ آتے اوغانستان آن رکھ کشنگ اٹ آسراتی فراوان کرینے۔ اوغانستان اٹی ودوک آ انسانی تنکی و اقتصادی ابتری ءِ توننگتو تو اونا منفی اثر تمک۔ ہڑتوم آ وزیرخارجہ غاک یوکرین نا حالیت آتیا ہم گپ وتران کریر۔ وزیرخارجہ جرمن ہم منصب ءِ بھارت نا کنڈآن 5 اگست 2019 نا غیرکانودی، اسہ کنڈی کارروائی آن پد انسانی حق انا بھلا خلاف ورزی تیان معلومدار کرے۔ جرمن وزیر خارجہ اینا لینا بیرباک اوغانستان آن پیش تمنگ ناعمل اٹی پاکستان نا کمک نا ستاءِ کرے و دا چرجوئی ٹی پاکستان نا پدریسہ مخ تفی نا اومیت ظاہر کرے۔ وزیرخارجہ جرمن وزیر خارجہ ءِ پاکستان نا دورہ ءِ کننگ نا سلہ خلک۔ ہڑتوم آ وزیر خارجہ غاک پاکستان و جرمنی نا نیام اٹ ہڑتوم آ کنڈآتا تعلقداری نا وڑآ است جمی نا درشانی ءِ کرسا اوفتے پین ودفنگ نا عزم انا درشانیءِ کریر۔
