اسلام آباد۔ 21 فروری (اے پی پی) وزیرخارجہ مخدوم شاہ محمود قریشی پارینے کہ چیلنج آتیان پد ہم حکومت پاکستان چناتتون تعلقدار پائیدار شونداری نا ہدف آتا دوئی کننگ کن پورو وڑاٹ سنبرینگوک ءِ۔ ترجمان دفتر خارجہ نا رداٹ داہیت ءِ او یونیسیف نا ایگزیکٹیو ڈائریکٹر کیتھرین رسل تون گپ وتران کرسا پارے ہرادوشنبے نادے آ وزارت خارجہ ٹی وزیر اوڑتون اوڑدہی کرے۔ وزیرخارجہ بطور ایگزیکٹیو ڈائریکٹر یونیسیف زمواری تا سنبھالنگ آ کھیترین رسل ءِ مبارکبادی تس و پارے کہ نن مچ آ دنیا نا چناتیکن یونیسیف نا اہم کاریم نا پورو مخ تفی ءِ کینہ۔ پاکستان چناتا حق انا بابت جہانی کہول آ اسہ اہم ءُ توار اسے نا وڑاٹ چاہنگک۔ پدتموک ملک مننگ نا ناطہ پاکستان ءِ چناتا بابت حق انا رکھ انا بابت کیہی چیلنج مون تروک ءِ ولے اوکان پد ہم پاکستان، چناتتون تعلقدار پائیدار شونداری نا ہدف آتا دوئی کننگ کن پورو وڑاٹ سنبرینگوک ءِ۔ شاہ محمود قریشی پارے کہ پاکستان چناتا حق انا رکھ اکن چندی کانودی، پالیسی و ادارہ جاتی گام گیج کرے۔ چناتا حق انا رکھ ءِ پک کننگ کن اسہ آجو قومی کمیشن اس جوڑ کننگا۔ حکومت اسکول آتیٹی چناتا داخلہ نا کچ اٹ ودکی کن پدریسہ کوشست کننگ ءِ۔ نن دا رداٹ یونیسیف نا کمکاری نا خواہندار اُن۔ وزیرخارجہ پاکستان اٹی چناتے رکھی ٹیکہ غاتا آسراتی نا فراوانی ٹی یونیسیف نا کمکاری نا ستاءِ کرے و پارے کہ کورونا نا دین نا برخلاف جنگ اٹ یونیسیف نا کمکاری ستاکڑزک۔ پاکستان کورونا دین ءِ شکست تننگ کن جامع حکمت عملی اس تینا کرے ہراٹی جان جوڑی تون اوار اوار راجی و اقتصادی پلو آتے ہم مون آ تخنگا۔ جنگ، بیدادی، مرغن انگا جھیڑہ و درملکی کوزہ غاتیان زہمی علاقہ غاتیٹی، چناک زیات بے رکھ ءُ، ہرافتے کن جہانی کہول آ لائحہ عمل اس جوڑ کننگ نا گرج ءِ۔ شاہ محمود قریشی پارے کہ مقبوضہ جموں و کشمیر اٹی انسانی حالیت، چنا و زالبول آتا انسانی حق انا خلاف ورزی تا چرجوئی قابل تشویش ءِ۔ اوغانستان نا سوگوی کن، انسانی و زرگزرانی تنکی نا توننگ بھاز المی ءِ۔ نن اوغان الس ءِ دمدستی انسانی کمکاری نا فراوانی نا رداٹ اقوام متحدہ نا سیکرٹری جنرل نا قائدانہ کڑد انا معترف ءِ۔ ولے، انسانی ہمدردی نا کوشست آک ہمووخت اسکان پائیدار پک مفسہ ہراتم اسکان کہ اوغان بینکنگ چینل آتے بحال کننگ و اوغان الس نا پیشن نا ملک میرات آتے غیر منجمد کننگ کن دمدستی گام گیج کننگپک۔ مخدوم شاہ محمود قریشی پارے کہ پاکستان، اوغانستان اٹی انسانی و زرگزرانی تنکی تا چٹفنگ تون اوار اوار اوغانستان اٹی دیرپا سوگوی کن ہر ممکن کوشست آتے کاریم اٹ اتنگءِ۔ پاکستان انسانی امداد نا ہت و در ، اقوام متحدہ نا آپریشنز، جہانی مالیاتی ادارہ، این جی اوز و ایلو فتا کمکاری کن انسانی ہمدردی نا راہداری، ءِ فعال کرینے۔ اوپارے کہ نن جہانی زمواری تا شریداری نا اصول نا رداٹ ، پاکستان اٹ اوغان مہاجر آتیکن یونیسیف نا کمکاری نا چاری اُن۔
