اسلام آباد۔ 21 فروری (اے پی پی) انفارمیشن ٹیکنالوجی نا بنجائی وزیر سید امین الحق کراچی ٹی بدامنی و سٹریٹ کرائم نا چٹفنگ کن لائحہ عمل اس پیش کرسا پارینے کہ ہندی پولیس آفیسر آتا تعیناتی، تھانہ غاتیٹی انٹیلی جنس نیٹ ورکنگ و محلہ کمیٹی تے دمدستی ٹہیفنگے۔ تھانیدار آتا تقرری کم از کم 3 سال اکن مرے، میرات آتا پورو سرجم آتے ہم مرتب کننگے۔ اوپارے کہ غیر ہندی آفیسر آتے نئے علاقہ غان آگاہی مریک و نئے علاقہ یا شار انا فائدہ غاتون کاریم اس ، کراچی نا 100 آن زیات تھانہ ءُ و ہر تھانہ نا دنگ اٹی کم از کم 10 آن 15 لکھ نیمہ آبادی ءِ۔ اوپارے کہ داخہ بھلو آبادی اسے ٹی انت مگے دا علاقہ غان کس اس تعلق تخوک آ پولیس آفیسر تعینات مننگ کپک؟ تھانہ نا دنگ اٹی واردات آتا گراف ودے ہمو آفیسر ءِ معطل آخا نوکری آن کشنگے۔ بنجائی وزیر پارے کہ انٹیلی جنس نیٹ ورک اسپیشل برانچ پولیس ءِ فعال و محلہ کمیٹی تا ٹہیفنگ آن گچین نیٹ ورک اس جوڑ مننگ کیک۔ اوپارے کہ سرکاری کیمرہ غاتا سہی کننگ، ہرگلی نا انٹری ایگزٹ آ ہنکینی تا کمک اٹ سی سی ٹی وی کیمرہ خلنگے۔ تھانہ غاتیٹی نفری و گاڈی تا کچ جوان مرے و اوفتا ریکارڈ ءِ سہ ماہی بنداو تیا چیک ہم کننگے، اگہ دمدستی وڑاٹ داوڑ کون آ گام گیج کننگتو تو ملک ءِ کٹیا کروک تروک آ دا شار پورو ژند مریک۔ اوپارے کہ شار اٹی ڈوہ انا گڑتی نا حد اسکان واردات آتیان پد ہم وزیراعلیٰ امن و ایمنی نا بابت ہچ ءُ دیوان اس بٹنگ تنے۔
