اسلام آباد۔ 18 فروری (اے پی پی) بنجائی وزیر حوالکاری و شینکاری چوہدری فواد حسین پارینے کہ ہڑدے ئی ڈان پٹرول نا نرخ آتیٹی ودکی نا اثر و ترجمان وزارت خزانہ نا فیک اکاؤنٹ آن ٹویٹ نا بابت خبر تو اولیکو پنہ غا نمان وڑاٹ شینک کرے ولے اینو ارٹ میکو دے داڑآ منہ سطری معذرت تہہ نا پنہ غا غیر نمان وڑاٹ شینک کرے، اخبار نا دا رویہ آجوئی صحافت آن چپ ءِ۔ بنجائی وزیر تینا ٹویٹ اٹی پارے کہ دا اولیکو موقع اف کہ ڈان فیک سوشل میڈیا نا بنداو آ اولیکو پنہ ءِ پُر کروءِ۔اوپارے کہ ڈان نا اولیکو پنہ غا خبر ءِ ہبو و داخبرآ معذرت ہراڑے چھاپ مس ، دادے ہم ہبو۔ اوپارے کہ داکان مست ڈان نیوز فیک میڈیا کانود شینک کرے و ایڈیٹوریل ہم خلک و اینو اسکان بشخنداری کتو، دا رویہ آجوئی صحافت نا برخلاف ءِ۔ یات سلے کہ ڈان نیوز ترجمان وزارت خزانہ نا فیک اکاؤنٹ آن ٹویٹ ءِ بنداو جوڑ کرسا فرنٹ پیج آ خبر اس خلکوسس۔ چوہدری فواد حسین دا بابت وزیر خزانہ نا ترجمان مزمل اسلم نا ٹویٹ ءِ ہم شیئر کرینے ہراٹی او پارینے کہ ڈان سٹی آ خبر ءِ تو اولیکو پنہ غا شینک کرے و داخبر آ معذرت ءِ تہہ نا قومی خبرآتا پنہ غا شینک کرے ۔ میڈیا نا دا طرزعمل بایدے مف۔ اخبار معذرت ءِ ہم ہندا پنہ غا شینک کے ہراڑآ خبرءِ شینک کننگاسس ایلو دروشم اٹ اونا ہچ ءُ گرج اس اف۔
