شہباز شریف، حمزہ شہباز تون اوار خاہوت نا برخلاف منی لانڈرنگ کیس انا مستی سماعت 25 فروری اسکان ملتوی

لاہور۔ 18 فروری (اے پی پی) احتساب عدالت لاہور مسلم لیگ ن نا صدر و مسکوہی وزیراعلیٰ پنجاب شہباز شریف، حمزہ شہباز تون اوار خاہوت نا برخلاف منی لانڈرنگ ریفرنس اٹی استغاثہ چار گواہ تیٹی اِرا گواہ تا بیان تے ریکارڈ کننگ و اِرٹ آشرہ ءِ پورو کننگ آن پد مستی سماعت 25 فروری اسکان پد بٹے، عدالت بروک آ سماعت آ پین اِرا گوعاہ تے شرہ کن بٹنگا۔ احتساب عدالت نا جج نسیم احمد ورک منی لانڈرنگ ریفرنس آ سماعت کرے۔ جمعہ نادے آ سماعت آ شہباز شریف و حمزہ شہباز عدالت اٹ پیش مسر و تینا حاضری ءِ خلفیر، شہباز شریف و حمزہ شہباز نا کنڈآن امجد پرویز ، محمد نواز چوہدری و محمد اورنگزیب ایڈووکیٹ پیش مسر۔ سماعت اٹی شہباز شریف نا وکیل امجد پرویز عدالت اٹی نیب انا اِرا گواہ معین راجپوت و سبوحی اسرار آ شرہ ءِ پورو کرے وخت اس کہ نیب انا اِرا گواہ فرواحسین و کاشف اسلام  نا بیان ریکارڈ کننگا، عدالت کیس انا پین سماعت ءِ بیست ءُ پنچ فروری اسکان پدبٹسا بروک آ سماعت آ پین گواہ تے بیان ریکارڈ کرفنگ کن بٹنگا۔ احتساب عدالت اٹی منی لانڈرنگ کیس اٹی شہباز شریف ، حمزہ شہباز تون اوار شانزدہ دوبہ دار پندار ءُ، اوفتا برخلاف ریفرنس 55پنہ غاتیا تالان ءِ ، شہباز شریف، سلمان شہباز، حمزہ شہباز، رابعہ شہباز، نصرت شہباز، نثار احمد ، شاہد رفیق ، یاسر مشتاق ، محمد مشتاق ، آفتاب محمود، محمد عثمان، طاہر نقوی ، قاسیم قیوم، فاضل داد عباسی و علی احمد ءِ پندار کننگانے، شہباز شریف تون اوار ایلو فتا برخلاف چار دوبہ دار وعدہ معاف گواہ مسنو، وعدہ معاف گوا ہ مروک آتیٹی شاہد رفیق، یاسر مشتاق، محمد مشتاق و آفتاب محمود اوار ءُ۔