پنڈدادنخان۔ 18 فروری (اے پی پی) بنجائی وزیر حوالکاری و شینکاری چوہدری فواد حسین پارینے کہ اپوزیشن آن لانگ مارچ تو مُر واک ہم مفک، نواز شریف، شہباز شریف و بلاول بھٹونا سیاست چٹانے، عمران خان ءِ ہرا اپوزیشن چیلنج کننگ ءِ او تینا نت تیا چرینگ انگ کپک، لانگ مارچ انت کرور، ہرافک بے پتی نا ہیت ءِ کننگ ءُ، اوفتیا اوفتا اُراوالاک پت کپسہ تو قوم امر پت کیک، اوفتے پاکستان نا الس نا پیسہ غاتے پدی تروئی مریک، نواز شریف دروغ تڑسا لندن آ ہنا، اینو اوفتا مسڑ عدالت آن پیشن سلوک ءِ، باوہ و ایلم وطن آ پدی بفننگ ءُ، دافک پاکستان نا الس نا ڈوہدار ءُ۔ داخیال آتا درشانی ءِ او جمعہ نادے آ داڑے کارندہ غاتیان تران کرسا کرے۔ بنجائی وزیر حوالکاری پارے کہ وزیراعظم نا جلسہ غاتیان اپوزیشن نا تغ حرام مریک، اینو اپوزیشن ءِ سماتمک کہ جم غفیر انت اس مریک، اینو منڈی بہاؤالدین اٹی وزیراعظم نا بخیر کننگ کن مخلوق نا بھلو کچ اس ساڑی ءِ۔ چوہدری فواد حسین پارے کہ اینو شہباز شریف آ فرد جرم بیٹ مروئی ئسک ولے اودا بہانہ کریر کہ ننے ہرا چالان ملانے اونا سیاہی خواننگ پننگ ءِ ، اودے خوانفنگ کن استاد اسے نا گرج ءِ، داوڑنا بہانہ کرسا اوبچپسہ۔ اوپارے کہ مقصود چپراسی ، مسرور احسن و منظور پاپڑ والا نا اکاؤنٹ آتیٹی ارب آ روپئی بس و اوفتا اکاؤنٹ آتیٹی گدریفنگا، اوفتے پاروئی مریک کہ دا زرآک امر گدریفنگار۔ چوہدری فواد حسین پارے کہ او فک پاکستان نا الس تون ظلم کرینو، اگہ دا ظلم انا کنڈآ کس اس چکار کرفینے تو او وزیراعظم عمران خان ءِ۔
