صوابی۔ 16 فروری (اے پی پی) اسپیکر قومی اسمبلی اسد قیصر چارشنبے نادے آ صوابی جوڈیشل کمپلیکس اٹی وکلاء کمپلیکس نا سنگ ءِ بنداو ءِ تخا۔ داوخت آ دود آن تران کرسا اوپارے کہ زمانہ طالب علمی نا دور آن وکیل آتا حق اکن جنگ ترسا کرینٹ۔ 22 سال انا جہد آن پد ملک انا بھاگ دوڑ اٹ نمائندگی نا موقع ملانے۔ پختون قبیلہ غاتیٹی چنکا چنکا دشمنی تیا خون مریک۔ عدالتی نظام اٹ اصلاحات آن الس ءِ اڑزآن انصاف نا فراوانی ممکن مننگ کیک۔ وخت آ و اڑزآن انصاف نا فراوانی آن الس نا عدالتی نظام آ پت اٹ پین ودکی مریک، اسد قیصر پارے کہ غٹ ءِ اواری اٹ ملک و قوم ءِ شونداری نا کنڈآ دننگ کن کڑد ادا کروئی ءِ۔ بحیثیت قوم ننے سیاست آن ایڑتر مرسا ملک و قوم انا شونداری کن کڑد ادا کننگ نا گرج ءِ۔ ساڑی حکومت صوابی ٹی ریکارڈ شونداری ڈٹ آتا بناءِ کرینے۔ 220 کے وی نا گریڈ اسٹیشن نا پوروی آن صوابی نا الس لوڈشیڈنگ و لووولٹیج نا ویل آتیان خلاصی دوئی مریک۔ باچا خان میڈیا کمپلیکس ءِ جان جوڑی نا پوسکن آ وڑنا آسراتی تیان آراستہ کننگ انگ ءِ۔ اوپارے کہ زچہ بچہ ہسپتال صوابی نا تاریخ نا پوسکن آ ہسپتال مریک۔ کوشست ءِ کہ قومی خزانہءِ الس نا راجی آسراتی کن خڑچ کننگے۔ خیبرپختونخوا نا تاریخ اٹ ساڑی حکومت نا السی راجی آسراتی نا ڈٹ آتے مدام یات تخنگک۔ کامران خان بنگش دود آن تران کرسا پارے کہ وکیل آتا تحریک اٹ اسپیکر اسد قیصر تون اوار مدام وکیل آتون تفینن۔ وکیل آتا ویل آتا ایسری کن ننا کمکاری برجاسلک۔ ساڑی آ دور اٹی ہائیر ایجوکیشن اٹ ریکارڈ شونداری کاریم مسنے۔ صوابی ٹی وویمن یونیورسٹی نا پوسکن آ کیمپس پوروی نا آخیریکو ریسہ غاتیٹی پترینگانے۔ صوابی بار ایسوسی ایشن نا صدر ملک دانیال اسپیکر قومی اسمبلی نا بشخ ہلنگ آ منت واری ءِ ہرفے و پارے کہ صوابی جوڈیشل کمپلیکس اٹ وکیل آتیکن پوسکن آ کمپلیکس نا تفنگ وکیل آتا دیرینہ خواست پورو مسنے۔
