کوئٹہ۔ 16 فروری (اے پی پی) گورنر بلوچستان سید ظہور احمد آغا پارینے کہ داہیت ننا غٹ اکن شرفمندی نا سوب ءِ کہ وزیراعظم پاکستان عمران خان نا ویژن نا رداٹ گری پاکستان مہم و چاگڑد دوست کوشست آتے انٹرنیشنل کہول آ زبردست پذیرائی ملنگ ءِ قدرتی چاگڑد، جنگل و جنگلی حیات نا رکھ اکن قومی و جہانی کہول آ دمدستی و وخت آ پین پبی گام گیج کننگ نا سخت گرج ءِ۔ داخیال آتا درشانی ءِ او چارشنبے نادے آ گورنر ہاؤس اٹی ورلڈ وائلڈ لائف نا سینئر ڈائریکٹر رب نواز و ریجنل ہیڈ طائر رشید نا اوڑدہی ٹی گپ وتران کرسا کرے۔ گورنر بلوچستان سید ظہور احمد آغا پارے کہ دا ہیت ننا غٹ آ پاش مسنے کہ گلوبل وارمنگ دراسل مچ آ دنیا نا انسان تیکن گلوبل وارننگ اسے۔ چک، ساہدار و درخت فطرت نا حسن ءُ ہنداخاطرآن ہر ذی شعور بندغ نا فرض ءِ کہ فطرت نا رنگینی و زیبائی ءِ برقرار تخنگ کن شعوری کوشست کیر۔ گورنر بلوچستان مستی پارے کہ مچ آ دنیا بے پرخ جنگل و جنگلی حیات ءِ نسخان تروک آتا برخلاف سکت کانودی کارروائی کننگے۔ السی کہو ل آ جنگل و جنگلی حیات نا رکھ اکن سخت کوشست کروک آ نجی ادارہ و خذمت گار آتا پبی است بڈی ءِ بایدے کننگے، گورنر بلوچستان اوڑدہی ٹی مستی پارے کہ چاگڑدی کچٹی نا مون ءِ توننگ کن ننے الس اٹ درخت آتا اہمیت و فائدہ غاتا احساس ءِ کروئی مریک۔ گورنر بلوچستان سید ظہور احمد آغا جہانی ادارہ جنگلی حیات آ زور شاغا کہ او مارخور، آئبیکس کون آ چک خاص وڑاٹ قومی چک ککو نا رکھ اکن جاگہ اس جتا کننگے۔
