اسلام آباد۔ 15 فروری (اے پی پی) وزیراعظم عمران خان پارینے کہ دنیا ٹی مون آ ہِننگ کن ٹیکنالوجی آن فائدہ ہرفوئی مریک، 22 کروڑ آبادی ءِ رسمی زرگزران نا بشخ جوڑ کرسامیرات جوڑ کننگ مریک، سمندر پار پاکستانی تیکن پین آسانی ودی کینہ، ہرافک خراج تفسہ اوفتسکان سرمرینہ، حکومت مشکل وخت اٹی راج انا نیزگار تپہ نا براہ راست کمک ءِ کیک، شیفکو تپہ نا حالیت آتے گچین کینہ، ہندا ننا اسل سرسہبی مریک، مچ آ دنیا ٹی نیزگاری ودا ولے پاکستان اٹی کم مس۔ داخیال آتا درشانی ءِ او سے شنبے نادے آ ملک انا اولیکو ڈیجیٹل پیمنٹ سسٹم ’’راست ‘‘ انا بناءِ کننگ نا دود آن تران کرسا کرے۔ وزیراعظم پارے کہ 22 کروڑ نا آبادی ءِ اگہ نن رسمی زرگزران نا بشخ جوڑ کین تو اوفتے اسہ میرات اسے ٹی بدل کننگ مریک۔ دنیا ٹی ٹیکنالوجی نا بشخ اٹی ہرا پوسکنی بننگ ءِ اوڑآن فائدہ ہرفپنہ تو دا 22 کروڑ مخلوق بھاریم اس مریک۔ وزیراعظم پارے کہ لس بندغ بینک آ ہِننگ آن خلیک۔ بینک آتیٹی ہم سوٹ بیننگ و انگریزی ٹی ہیت کروک آتے اہمیت تننگک۔ ’’راست‘‘ آن لس بندغ ءِ آسراتی دوئی مریک۔ اوپارے کہ شیفکو تپہ ءِ بڑزہرفنگ حکومت نا اسل سرسہبی ءِ۔ خیبرپختونخوا ٹی ننا حکومت بس تو دا صوبہ دہشت گردی نا گواچی ئس۔ 500 آن 700 پولیس کارندہ شہید مسوسر۔ دا صوبہ ٹی نن ہراگام گیج آتے کرین اوفتا سوب آن خیبرپختونخوا نا الس ہرا ارٹ میکو وار کس اسے موقع تفسہ ننے اِرا تہائی گیشتری اٹ دُوارہ گچین کریر۔ دانا سوب دا ئسک کہ اقوام متحدہ نا ادارہ یواین ڈی پی نا رداٹ خیبرپختونخوا ٹی نیزگاری غٹ آن زیات ترندی اٹ کم مسوسس، ہنداخاطرآن ہموجاگہ نا الس ننے دُوارہ گچین کرے۔ وزیراعظم پارے کہ حکومت نا ایسر آ ننا سرسہبی نا پیمانہ دامریک کہ ملک اٹی نیزگاری کم مس یا آخا و شونہالی نا بھرم شیف اسکان ہنا یا آخا۔ وزیراعظم پارے کہ ورلڈ بینک انا رپورٹ نا رداٹ مچ آ دنیا ٹی نیزگاری ودا ولے پاکستان اٹی قدرے کم بس۔ اوپارے کہ خواری کش و لس تپہ نا بندغ آتون بینک آتیا ہِننگ نا وخت مفک۔ راست آن لس بندغ ءِ تینا موبائل فون نا کمک اٹ ہم بینکنگ نا آسراتی دوئی مریک و سیونگ گچین مریک۔ وزیراعظم پارے کہ پاکستان اٹی خراج ٹوجی ڈی پی ریشو کم ءِ دا چرجوئی ٹی گام گیج کننگ انگ ءِ۔ ایف بی آر اٹی ہم ٹیکنالوجی ءِ کاریم اٹ اتینہ۔ 22 کروڑ نا آبادی ٹی بیرہ 20 لکھ مخلوق خراج ایتک۔ ہندن ءُ بندغ ہم ارے ہرافتا لائف اسٹائل بھاز جوان ءِ و اُراتیٹی گاڈیک سلوک ءُ ولے اسہ روپئی اس خراج تفسہ۔ داسہ نن ٹیکنالوجی ءِ کاریم اٹ اتسا اوفتسکان ہم سرمرینہ و اوفتیان ہم خراج ہلینہ۔ وزیراعظم اسٹیٹ بینک انا کارکڑد نا ستاءِ کرسا پارت کرے کہ سمندر پار پاکستانی تیکن پین آسانی ودی کننگے و اوفتا غاوتا ازالہ کن سیل اس جوڑ کننگے۔ اوپارے کہ سمندر پار پاکستانیک ننا بھاز بھلو میرات اسے ءُ۔ زرمبادلہ نا کوڑی تیٹی اوفتا غٹ آن بھلو کڑد اسے۔ اوفتے کن پین آسانی ودی کننگک۔ شیفکو تپہ نا حالیت آتے گچین کینہ۔ دا چرجوئی ٹی راست آن ہم فائدہ ہرفنگک۔ داکان مست وزیرخزانہ شوکت فیاض ترین دود آن تران کرسا پارے کہ بینکنگ سیکٹر بھاز شون ہلکونے۔ اسہ زمانہ سے ٹی زر انا گدریفنگ اٹ بھاز دے لگاکہ ولے راست انا کمک اٹ داسہ دا کاریم سیکنٹ اٹی مریک۔ بینکنگ نا بشخ اٹی انقلاب اس بسنے۔ داڑآن ای کامرس اٹی ہم ودکی مریک و نئے بیرہ بندغ آتا نیام اٹ بلکن کاروباری و واپاری لین دین کن ہم پوسکن آ ٹیکنالوجی و راست ءِ کاریم اٹ اتنگک۔ وزیرخزانہ پارے کہ آئی ٹی نا بشخ اٹی شونداری آن بینکنگ بشخ ءِ بھاز فائدہ مننگ ءِ۔ گورنر اسٹیٹ بینک رضاباقر دود آن تران کرسا پارے کہ وزیراعظم بینکنگ نا نظام ءِ گچین کننگ نا مدام پارت کرینے۔ بینک داسہ لس شاری تے ہم وام تننگ ءِ۔ راست، ڈیجیٹل، ادائیگی ٹی انقلاب اس برپاکیک۔ اوپارے کہ راست انا چار خصوصی جزو ءُ، دانا کمک اٹ دمدستی ادائیگی مریک۔ راست کیش ادائیگی آن چپ دمدستی ڈیجیٹل ادائیگی ممکن جوڑ کیک۔ راست پورو وڑاٹ مفت خذمت ءِ، داٹی ہچ ءُ پوشیدہ چارجز اس اف۔ راست اکن موبائل نا کمک اٹ رجسٹریشن مریک و ایپ ، انٹرنیٹ بینکنگ نا چینل آتا کمک اٹ داڑاسکان رسینگ ممکن ءِ۔ راست ءِ بینک اسے نا اکاؤنٹ تون منسلک کننگک۔ اوپارے کہ پوسکن آ پاکستان ہاؤسنگ اسکیم نا رداٹ بینک آتیان 131 ارب روپئی وام نا منظوری تننگانے۔ پاکستان اٹ ڈیجیٹل بینک انا جوڑ کننگ کن فریم ورک اس ٹہیفنگانے۔ ڈیجیٹل بینک کم فیس اتون زیات آسراتی فراوان کیک۔ اوپارے کہ مرمر انگا علاقہ غاتے ٹی نادرا تون اواری اٹ اکاؤنٹ اس ملنگ کن بائیو میٹرک نا آسراتی ہم فراوان کننگ انگ ءِ۔ اوپارے کہ پیشن نا ملک رہینگوک آ پاکستانی تے ملکی بینکاری نا نظام اٹی اوار کننگ کن خصوصی گام گیج کننگانے۔ اوپارے کہ تدوک آ مالی سال اٹی 500 ارب ڈالر ای بینکنگ نا کمک اٹ منتقل مس۔ دا کچ ڈی جی پی آن ہم زیات ءِ۔ ای بینکنگ لین دین اٹ ہرسال 30 درسد ودکی مننگ ءِ۔ اوپارے کہ داوخت آ دہ کروڑ شاری تتون موبائل فون ارے ولے او بینکنگ نا آسراتی آن فائدہ ہرفپننگ ءُ۔ منہ ہفتہ ٹی غٹ بینک ’’راست‘‘ اتون منسلک مریرہ۔
