اسلام آباد۔ 15 فروری (اے پی پی) وزیراعظم نا خصوصی کمکار امور نوجوانان عثمان ڈار پارینے کہ سرسہب ورناپروگرام نا کمک اٹ گوازی تا سرجزآتے مو ن آ درسا اسپورٹس اکانومی ءِ سوگو کننگ انگ ءِ، بنجائی حکومت سندھ اٹی تینا زمواری تے پورو کننگ ءِ، سندھ حکومت ہم ورناتا راجی آسراتی کن بایدے گام گیج کے۔ سے شنبےنادے آ پریس کانفرنس آن تران کرسا اوپارے کہ سرسہب ورنا پروگرام نا بے سود وام اسکیم نا رداٹ کراچی ٹی ورناتیٹی 3 ارب روپئی بشخنگانے۔ مچ آ سندھ انا ورناتیٹی 8 ارب روپئی بشخنگانے۔ اوپارے کہ میڈیا انڈسٹری آن تعلق تخوک آصحافی و کیمرامین ہم دا پروگرام نا رداٹ وام دوئی کننگ کیرہ۔ ہنداوڑ صحافیک وظیفہ و گوازی تتون اوار سرسہب ورناپروگرام نا غٹ اسکیم تا بشخ جوڑ مننگ کیرہ۔ سرسہب ورنا پروگرام نا رداٹ ورناتے واکدار کننگ کن گچین گام گیج کننگ انگ ءِ۔ اوپارے کہ سرسہب ورنا پروگرام نا بزنس لون اسکیم نا رداٹ 25 ہزار 700 ورناآسان شڑت آتیا وام دوئی کننگ نا اہل مسنو و اوفتا کاروبار کن 39 ارب روپئی منظور کننگانے۔ ورناک کشاری بشخ اکن دونیم ارب روپئی نا وام آن 2 ہزار ٹیکٹر ہلکونو۔ دااسکیم نا رداٹ 10 ہزار ٹیکٹر فراوان کننگک، کشاری بشخ انا ایلو بشخ لائیو اسٹاک و مشینری کن ہم آسان شڑت آتیا وام فراوان کننگک۔ اوپارے کہ سرسہب ورناپروگرام نا رداٹ داتم اسکان ورناتے اسہ لکھ اسکالر شپ تننگانے۔ مسٹ میکو ریسہ ٹی اسکالر شپ اکن 4 لکھ درخواست جمع کرفنگانے۔ 60 ہزار ورناتے اسکالر شپ تننگک۔ سندھ انا ورناتے داکان مست 22 ہزار نا لگ بھگ اسکالر شپ تننگانے و دا ریسہ ٹی پین 13 ہزار اسکالر شپ تننگک۔ اوپارے کہ سندھ حکومت 18 می ترمیم نا کریڈٹ ہلیک، دا ترمیم نا رداٹ امور نوجوانان صوبہ غاتا زمواری ءِ ولے سندھ اٹی امور نوجوانان نا ہچ ءُ وزیر اس ہم اف۔ سندھ انا ورناک بنجائی حکومت نا کنڈآ ہریرہ۔ بنجاسندھ انا ورناتا راجی آسراتی کن غٹ وسیلہ غاتے کاریم اٹ اتنگ ءِ۔ سندھ انا ورناتے ہچ ءُ حالیت اسے ٹی تنیا اِلنگ پننگک۔ لاڑکانہ غا کانہ و بلاول بھٹو ءِ پانہ کہ ہموڑے بنجاورناتیکن ہراوڑ کاریم کننگ ءِ۔ اوپارے کہ سرسہب پاکستان پروگرام نا رداٹ 5 لکھ روپئی اسکان ورناتے بے سود وام تننگ انگ ءِ۔ جان جوڑی کارڈ، پوسکن آ پاکستان ہاؤسنگ اسکیم و احساس پروگرام نا رداٹ ورناتے واکدار کننگ کن گام گیج کننگ انگ ءِ۔ اوپارے کہ وزیراعظم ورناتے ملک انا میرات گوندانے و اوفتے غٹ پروگرام تیٹی اوار کننگانے۔ اوپارے کہ ورناتے دراخہ جوڑ انگا سرجزآتیٹی اوار کننگ و وارخواہی فراوان کننگ کن سرسہب ورناپروگرام اسپورٹس اینڈ ٹیلنٹ ہنٹ پروگرام نا بناءِ کننگانے۔ دامہم ءِ ہرخلق اسکان تالان کننگک۔ اوپارے کہ ہاکی، ریسلنگ و ویٹ لفٹنگ نا مقابلہ غاتا چیمپین شپ زوت مریک۔ انعام بٹ سرسہب ورنا ریسلنگ ایمیسیڈر مریک۔ ننا ہدف آخبت کامن ویلتھ گیمز ءِ۔ ننے ملک اٹ اواری اٹ گوازی تے مون آ دروئی ءِ۔ فٹ بال ڈرائیو نا رداٹ 20 ورنافٹ بالر گچین کننگانے۔ ورناتا لائخی تے تالان کننگ کن گوازی تا غٹ فیڈریشن و صوبہ غاک اواری اٹ کاریم کیر۔ اوپارے کہ مستین اٹ گوازی تے گوجالنگا و بھس کننگا۔ اوپارے کہ سرسہب ورناپروگرام نا رداٹ اسٹ آن 10 لکھ، 10 لکھ آن اسہ کروڑ و اسہ کروڑ آن دونیم کروڑ اسکان نا وام تننگ انگ ءِ وخت اس کہ سرسہب پاکستان پروگرام نا رداٹ 5 لکھ روپئی اسکان نا بے سود وام تننگ انگ ءِ۔ اسہ سوج اسے نا ورندی ٹی اوپارے کہ سرسہب ورنا پروگرام نا رداٹ اسلامی بینکاری نا رداٹ ہم وام دوئی کننگ کیرہ۔ ورناتیٹی ہر تُو 3آ ن 4 ارب روپئی بشخنگ انگ ءِ۔ نن داٹی پین ترندی اتنگ خوانہ۔ اسہ پین سوج اسے نا ورندی ٹی اوپارے کہ وزیراعظم عمران خان سرسہب ورناپروگرام نا رداٹ گوازی تا سرجزآتیکن 4 ارب روپئی جتا کرینے۔ دا پروگرام نا رداٹ 12 گوازی تا مقابلہ اڈتننگک۔ داپروگرام تا کمک اٹ سرسہب ورنا ہیرو ز و چیمپین تے مون آ اتینہ۔
