اسلام آباد۔ 15 فروری (اے پی پی) جرمنی نا سفیر برن ہارڈ سٹیفن شیلک سے شنبے نادے آ اسپیکر قومی اسمبلی اسد قیصر تون اوڑدہی کرے ہراٹی ہڑتوم آکنڈآتا تعلقداری و تین پہ تینی است خواہی نا اہم باندات آ گپ وتران کننگا۔ اسپیکر قومی اسمبلی پارے کہ جرمنی یورپی یونین نا اہم ءُ ملک اسے۔ پاکستان، جرمنی تون تینا متکن آ دوستانہ تعلقداری تے بھاز اہمیت ایتک۔ ہڑتوم آ ملک آک اہم جہانی و علاقائی امور آ اسہ وڑ موقف تخرہ۔ پارلیمانی و اقتصادی رابطہ غاتے ٹی مون آ دننگ ہڑتوم آ کنڈآتا تعلقداری تے پین سوگوی کن المی ءِ۔ ہڑتوم آ ملک آتا نیام اٹ چندی بشخ آتیٹی تین پہ تینی کمکاری ءِ مون آ دننگ نا بھلو وارخواہی اس ساڑی ءِ۔ پاکستان اٹ راجی بشخ انا شونداری ٹی جرمن شونداری تنظیم تا کڑد ستاکڑزک، اسپیکر قومی اسمبلی پارے کہ ہڑتوم آ ملک آتا پارلیمنٹ نا باسک آک ہڑتوم آ ملک آتا الس ءِ خڑک اتنگ و ہم آہنگی نا مون آ دننگ کن اہم کڑد اس ادا کننگ کیرہ۔ اوغانستان نا ساڑی آ حالیت آک جہانی چکار نا خواہندار ءُ۔ جہانی برادری اوغانستان اٹی ودی مروک آ انسانی تنکی نا مون ءِ توننگ کن کڑد ادا کے۔ جہانی امن و شونہالی پاکستان نا اولیت ءِ۔ جرمن سفیر پارے کہ جرمنی پاکستان ءِ تینا سنگت و اقتصادی شریدار تکک۔ جرمن پارلیمنٹ پاکستان نا قومی اسمبلی تون کمکاری ءِ پین ودفنگ نا خواہندار ءِ۔ جرمنی اقتصادی و راجی بشخ آتیٹی ہڑتوم آ کنڈآتا کمکاری ٹی پین ودکی خواہک۔ جرمنی پاکستان اٹ تعلیم خاص وڑاٹ فنی تعلیم نا بشخ آتیٹی کمکاری ءِ پین ودفنگ اٹ خاص است خواہی تخک۔ پارلیمانی سنگتی پڑک ہڑتوم آ ملک آتے پین خڑک اتنگ اٹ اہم ءُ کڑد اس ادا کیک۔ دنیا ٹی امن کن پاکستان نا کڑد ستاکڑزک۔
