کوئٹہ۔ 15 فروری (اے پی پی) ڈپٹی اسپیکر بلوچستان اسمبلی سردار بابر خان موسیٰ خیل پارینے کہ طالب علم آک ننا آخبت ءُ، صوبائی حکومت تعلیمی ادارہ غاتا شونداری و اوفتے فعال کننگ کن کوشست کننگ ءِ۔ داخیال آتا درشانی ءِ او بلوچستان نا علاقہ دکی نا دورہ نا وخت آ گپ وتران کرسا کرے، دکی آ سرمننگ آ موسیٰ خیل قبیلہ نا سد آ بندغ آک مندے ٹک آن جلوس نا دروشم اٹ اودے بخیر کریر، ہندی اسکول اٹی اڈہلوک آ دود آن ڈپٹی اسپیکر بلوچستان اسمبلی سردار بابر خان موسیٰ خیل ، باپ پارٹی نا صوبائی راہشون ایڈووکیٹ امیر محمد ترین، مفتی عبدالشکور الظفر، سینئر صحافی رحمت اللہ موسیٰ خیل، پی ٹی آئی نا راہشون سردار زادہ محبوب خان ترین ئسک تران کریر۔ دود آن تران کرسا ڈپٹی اسپیکر بلوچستان اسمبلی سردار بابر خان موسیٰ خیل پارے کہ پرائیویٹ تعلیمی ادارہ غاتا تعلیم نا مون آ دننگ اٹ اسہ اہم ءُ کڑد اسے ہراڑآن انکار ممکن اف، مفتی عبدالشکور الظفر نا تعلیمی خذمت روشناانگا دے آنبار پاش ءِ، حکومت تعلیمی ادارہ غاتے بنداوی آسراتی فراوان کننگ اٹ لگوک ءِ، طالب علم آک بلوچستان و پاکستان نا آخبت ءُ اگہ نن اوفتے سہی تعلیم تسن تو دا طالب علم آک ملک و قوم انا پن ءِ روشنا کرسا ڈاکٹرز، انجینئرز و ایلو بشخ آتیٹی اہم کڑد اس ادا کیرہ، چناتے اسکول آتا تعلیم نا گرج اتون اوار اوار لمہ و باوہ غاتا فرض مریک کہ او تینا چناتا گچین تربیت ءِ ہم کیر تانکہ دا چناک قوم انا جوڑ کروک مریر اوپارے کہ قوم اللہ تعالیٰ پہچان کن ننے غٹ ءِ تسنے داڑے رہینگوک آ قومک غٹ بریبر ءُ اسہ قوم اس ہم اسٹ اسے آن کم تر اف، ہراتم اسکان نن انسانیت، ملک و تینا علاقہ نا شونداری کن کاریم کپنہ ہمووخت اسکان نن سرسہب مننگ کپنہ، بروک آ چین تے نن بایدے انسانیت نا درس ایتن ۔ دود انا ایسر آ ڈپٹی اسپیکر سردار بابر خان موسیٰ خیل و ایلو مہمانک طالب علم آتیٹی شیلڈز و انعام بشخار۔
