اقوام متحدہ۔ 15 فروری (اے پی پی) پاکستان پارینے کہ جہانی برادری کورونا دین انا پژدر اٹ پائیدار شونداری نا ہدف 2030 انا دوئی کننگ کن زیات آن زیات کمک کے۔ اقوام متحدہ ٹی پاکستان نا نائب آخبتی نمائندہ عامر خان اقوام متحدہ نا اقتصادی و راجی کونسل (ای سی او ایس او سی) نا ذیلی ادارہ راجی شونداری نا کمیشن نا دیوان آن تران کرسا پارے کہ نیزگاری نا چٹفنگ پائیدار شونداری(ایس ڈی جی) نا اولیکو ہدف و بین نا چٹفنگ ایس ڈی جی نا ارٹ میکو ہدف ءِ ہراڑکن قومی و جہانی کہول آ پبی کوشست و کمکاری نا گرج ءِ۔ اوپراے کہ نیزگاری ٹی کمتی و غذائی بے رکھی تون مون تننگ ننا حکومت نا فلیگ شپ پروگرام ’’احساس‘‘ نا اہم مسخت ءُ۔ اوپارے کہ وسیلہ غاتا کمتی آن پد ہم وزیراعظم عمران خان نیزگار و نزور تپہ غاتا اسہ کروڑ 20 لکھ بندغ آتے احساس پروگرام نا رداٹ براہ راست زرتس اکن 8 بلین ڈالر نا پیکج تس۔ اوپارے کہ سمارٹ لاک ڈاؤن نا پالیسیک 12 ملین اُراتے دمدستی ریلیف ترسا مخلوق نا زند و معاش ءِ بچفیر۔ پاکستان نا شونداری حکمت عملی ٹی پناہ گاہ ، نیزگار آتے جان جوڑی نا مفت آسراتی تا فراوانی، ورناتے واکدار کننگ نا پروگرام و بزغرآتے ٹارگٹڈ سبسڈی فراوان کننگ اوار ءِ۔ پاکستانی مندوب داہیت آ گڑتی نا درشانی ءِ کرے کہ راجی شونداری نا جہانی سربراہی دیوان نا 20 سال آن پد ہم پیش رفت سست روی و بے آوار مسنے۔ پدتموک ملک آتے انسداد نیزگاری و راجی رکھ انا پروگرام تا فراوانی کن بھلو مالی وسیلہ و لیکویڈ ٹی انا گرج ءِ۔ اوپارے کہ ہزگار ملک آتیٹی مالی سرپلس کن 17 ٹریلین ڈالر جمع کننگانے وخت اس کہ پدتموک ملک آک 4.3 ٹریلین ڈالر نا اسہ بشخ اسے ہم متحرک کننگ کن جہد کننگ ءُ ہرافتا اوفتے کورونا دین آن زہمی زرگزران نا بحالی کن گرج ءِ۔ پاکستانی سفیر عامر خان غٹ ممکنہ ذریعہ غاتے اٹ وسیلہ غاتے متحرک کننگ آ زور شاغسا پارینے کہ خاص وڑاٹ وام تا ری شیڈولنگ، 0.7 درسد آفیشل ڈویلپمنٹ اسسٹنس (ODA) نا ہدف نا پوروی، پوسکن آ خصوصی ڈرائنگ رائٹس اٹی 650 بلین ڈالر نا دُوارہ بشخنگ و جہانی مالیاتی فنڈ(آئی ایم ایف) آن بھلا مالیاتی کمکاری کون آ گام گیج آتا ہم گرج ءِ۔
