اسلام آباد۔ 15 فروری (اے پی پی) برطانیہ ٹی کاریم کروک آ پاکستانی تا زررادہ کننگ اٹ برجامالی سال انا اولیکو 7 تُو اٹی تدوک آ مالی سال انا ہندا مد انا مقابلہ ٹی 13.2 درسد نا نمو ریکارڈ کننگانے۔ اسٹیٹ بینک انا کنڈآن دابابت جاری کروک حساب وکتاب نا رداٹ جولائی آن ہلیس جنوری 2021اسکان نا مد اٹی برطانیہ ٹی کاریم کروک آ پاکستانیک 2.467 ارب ڈالر نا زرمبادلہ ملک آ گدریفیر ہرا تدوک آ مالی سال انا ہندا مد انا مقابلہ ٹی 13.2 درسد زیات ءُ، تدوک آ مالی سال نا ہندا مد اٹی برطانیہ ٹی کاریم کروک آ پاکستانیک 2.178 ارب ڈالر نا زرمبادلہ ملک آ گدریفیسر۔ جنوری 2022 اٹی برطانیہ غان زررادہ کننگ نا کچ 320.1ملین ڈالر ریکارڈ کننگا ہرا تدوک آ سال جنوری نا مقابلہ ٹی 6.16 درسد زیات ءُ، تدوک آ سال جنوری ٹی برطانیہ غان زررادہ کننگ نا کچ 301.5ملین ڈالر ریکارڈ کننگاسس۔ یات سلے کہ حکومت نا کنڈآن کانودی و بینکنگ ذریعہ اٹ زررادہ کننگ نا است بڈی کن گام گیج آتیٹی برجامالی سال انا اولیکو 7 تُو اٹی سمندر پار پاکستانی تا زررادہ کننگ اٹ تدوک آ مالی سال انا ہندا مد انا مقابلہ ٹی 9.1 درسد نا نمو ریکارڈ کننگانے۔ مالی سال 2021 ٹی سمندر پار پاکستانی تا زررادہ کننگ اٹ 24 درسد نا نمو ریکارڈ کننگاسس۔
