اسلام آباد۔12فروری (اے پی پی): مزن وزیر عمران خان ءَ گوستگیں سال ءِ گیواری بوتگیں 15 لکھ شکاست آنی تہ ءَ شہری آنی دوارگ شکاست آنی پد ءَ 2 لکھ سی ءُ ھشت ہزار شکاست آناں دوارگ پچ کنگ ءِ حکم جاڑی کتگ۔ شکاست آناں دوارگ چارگ ءِ واستہ سیادی داروکیں اپسرگ آنی ھوالگ ءَ کنگ بہ بیت۔ شمبے ءِ رو چءَ مزن وزیر کارگس ءِ نیمگ ءَ جاڑی بوتگیں پریس ریلیز ءِ رد ءَ مزن وزیر عمران خان ءَ پنت ءُ شون کت کہ صوبائی تک ءَ چار ءُ بچار ءِ نگرانی سیادی داروکیں چیف سیکرٹری ءُ آئی جی بکن انت ءُ بنجاھی تک ءَ سیادی دساروکیں وزارت آنی سیکرٹری شکاست آنی دوارگ چارگ ءِ زمہ وار بنت۔ مزن وزیر ءَ بنجاھی ادارگ آنی کلی یک لکھ ھپت ہزار شکاست آناں دوارگ پچ کنگ ءِ ھم حکم داتگ صوبائی تک ءَ 80 ہزار شکاست حکومت ءِ پنجاپ ءِ چیر دستیں ادارگ آنی انت۔ مزن وزیر کارگس ءَ چہ اے ھم گوشگ بوتگ کہ حکومت خیبر پختونخوا ءِ چیر دستیں ادارگ آنی 27 ہزار شکاست آناں پچ کنگ بہ بیت ءُ صوبہ سندھ ءِ 15 ہزار، بلوچستان ءِ 3 ہزار، آزات کشمیر ءِ یازدھ سد شکاست آنی سر ءَ چار ءُ بچار کنگ بیت، گلگت بلتستان ءَ 400 شکاست آناں دوارگ پچ کنگ بیت، شکاست میونسپل سروسز، بجلی ءُ گیس، رسانک ءُ وانگ ءُ زانگ ءِ شوبگ ءِ ھوالگ ءَ انت، مزن وزیر کارگس ءِ پنت ءُ شون ءَ گوشگ بوتگ کہ شکاست آنی سر ءَ چار ءُ بچار کنان ءَ سیادی داروکیں اپسرگ رپوٹ جم بکنائین انت۔
