سی پیک ءِ ہوالگءَ پاکستان ءِ مزن وزیر عمران خان ءِ بیان لکھ ستاہ کرزیت، بیلٹ اینڈ روڈ ءِ فلیگ شپ منصوبہ ءِ تہا درائیں ملک ء ُ میاں  اوستمانی تنظیم آنی ہواری ءَ را وش اَتک کناں، چین

بیجنگ۔11فروری  (اے پی پی):چین ءَ چین پاکستان اقتصاد ی راہداری ، سی پیک ءِ ہوالگءَ پاکستان ءِ مزن وزیر عمران خان ءِ بیان ءَ را ساڑاتگء ُ گشتگ کہ چین ءُ پاکستان ہم تپاکی ءِ بنیات ءَ بیلٹ اینڈ روڈ ءِ فلیگ شپ منصوبہ یا سی پیک منصوبہ ءِ تہا درائیں ملک ء ُ میاں اوستمانی تنظیم آنی ہوار بوہگءَ را وش اَتک کنت۔ چینی دری کارانی وزارت ءِ جارچین زہائولیجیان ءَ  جمعہ ءِ روچ ءَ ہمک روچگیں بنیات ءَ  بوتگیں شونست ءِ تہا گشتگ کہ مزن وزیر عمران خان ءَ ایندگہ ملک آناں سی پیک ءِ منصوبہ آنی تہا ہوار بوہگ ء ُ زرکاری ءِ دعوت ءِ ہوالگءَ بیان لکھ ستاہ کرزیت۔ آئی ءَ گشتگ کہ چین ءُ پاکستان ہم تپاکی ءِ بنیات ءَ بیلٹ اینڈ روڈ ( بی آر آئی ) منصوبہ یا سی پیک منصوبہ ءِ ہمراہ داری، دونیمگی کمک ءِ ھاترءَ کمک کنگ ء ُ سی پیک ءِ دیمروئ ءِ تہا بھر زورگ ءِ ھاترءَ یکجاہی دیمروئی ءِ کوشت کنوکیں درائیں ملک ء ُمیاں اوستمانی تنظیم آناں وش اَتک کناں تنکہ دیمروئی ءِ برورد بھر  ء ُ بانگ کنگ بہ بنت۔ آئی ءَ گشتگ کہ بی آر آئی ءِ یک حاسیں پائلٹ پروجیکٹ ءِ ردءَ چین پاکستان اقتصادی راہدادی ( سی پیک) ءَ بازیں شورءُ صلہ، یکجاہی شریداری ء ُ یکجاہی پائدگانی رھبنداناں برجاہ داشتگ۔ آئی ءَ گشتگ کہ ما ماحول دوستیں دیمروئی، جان ء ُ سلامتی ء ُ ڈیجیٹل معیشت ءِ ھاترءَ یک راہداری جوڑ کنگ ء ُ سی پیک ءَ را بی آر آئی منصوبہ ءِ ردءَ مزن تک ءِ دیمروئی ءِ بے مٹیں  ء ُ جوانیں منصوبہ جوڑ کناں۔ اے گپ  زانگ بہ بیت کہ عمران خان ءَ انوگیں وتی یک گلگودارےءِ تہا گشتگ کہ  چین ءِ بیلٹ اینڈ روڈ منصوبہ پاکستان ءِ مردماناں نیزگاری ءَ چہ درکنگ ء  ُ آیانی دیمروئی ءِ تہا پاکستان ءِ کمک کار بوت کنت۔ آئی ءَ گشتگ کہ ما سی پیک ء ُ گوادر ءَ را وتی جیواکنامکس ءِ ھاترءَ یک گہتریں موہ ءِ ردءَ گنداں ء ُ منی حیال ءَ اے پاکستان ء ُ چین ءِ نیام ءَ حاس نااِنت بلکیں ما سی پیک ءِ منصوبہ آنی تہا ایندگہ ملک آناں ہوار کنگ ء ُ زرکاری ءِ دعوت ءَ دیاں ۔