اسلام انسان تے رنگ و نسل ناجاگہ غا اللہ و اونا بندغ آتا حق انا ادائیگی نا بنداو آ عزت وشرف نا رتبہ ایتک، خطیب جہانی یونیورسٹی ڈاکٹر ضیاء الرحمان

اسلام آباد۔ 11 فروری (اے پی پی) خطیب جہانی اسلامی یونیورسٹی ڈاکٹر ضیاء الرحمان ایوان صدر نا جامع مسجد اٹی ’’راجی تہپہ و اسلامی راج‘‘ انا سرحال آ خطبہ جمعہ ٹی پارینے کہ اسلام انسان تے رنگ و نسل نا جاگہ غا اللہ و اونا بندغ آتا حق انا ادائیگی نا بنداو آ عزت و شرف نا رتبہ ایتک۔ ایوان صدر نا جامع مسجد آن خطبہ جمعہ ءِ براہ راست نشر کننگا۔ صدر مملکت ڈاکٹر عارف علوی و ایوان صدر نا کمامدار و عملہ نماز جمعہ ءِ خوانار۔ ڈاکٹر ضیاء الرحمان تینا خطبہ ٹی پارے کہ اللہ تعالیٰ نظام اٹ توازن ودی کننگ و انسان تے باہم سوگو کننگ کن اوفتا گرج آتے اسہ ایلو تون گنڈانے، ولے صاحب حیثیت تپہ غاتیا لازم ءِ کہ او دوئی نعمت آتیٹی ایلوفتے ہم اوار کیر، غریب، مسکین، چوری و حقدار آتا اوفتیا حق ءِ۔ اوپارے کہ اللہ و اونا بندغ آتا حق ءِ ادا کننگ، نیکی و نزور آتیا احسان کننگ بڑزکو انسانی سفت آ ک ءُ و اوفتا بھلو اجر اسے۔ داوخت آ ملک و قوم انا سلامتی، شونداری و شونہالی کن دعا کننگا۔ یات سلے کہ صدر مملکت ڈاکٹر عارف علوی نا پارت آ مخلوق نا راہشونی کن ایوان صدر نا جامع مسجد آن خطبہ جمعہ ءِ براہ راست نشر کننگ نا چرجوئی نا بناءِ کننگانے۔