اسلام آباد۔ 11 فروری (اے پی پی) وزیرخارجہ مخدوم شاہ محمود قریشی پارینے کہ سویلی پنجاب صوبہ بیرہ تنقید اٹ آخا، آئینی ترمیم اٹ جوڑ مریک، انت بلاول داآئینی ترمیم کن ننتون کمک کننگ کن تیار ءِ۔ سویلی پنجاب نا بابت جمعہ نادے آ تینا بیان اٹی وزیرخارجہ پارے کہ بلاول بھٹو نا ناسرپندی و اونا استاد نالائخ ءِ۔ اوپارے کہ بلاول بھٹو ءِ لکھوک ءُ پرچی تننگک ، بلاول بھٹو ءِ داسکان درک اف کہ او انت پاننگ ءِ، و حقیقت انت ءِ، ہندن ہندن وخت گدرینگک بلاول پہہ مریک کہ بیرہ تنقید اٹ سویلی پنجاب صوبہ جوڑ مفک، سویلی پنجاب صوبہ آئینی ترمیم اٹ جوڑ مریک۔ کنا سوجءِ کہ انت بلاول آئینی ترمیم کن ننتون کمک کننگ کن تیار ءِ۔ شاہ محمود قریشی پارے کہ اگہ سویلی پنجاب صوبہ ءِ عملی دروشم اس تننگ خواہک تو برے اواری اٹ آئینی ترمیم کے۔ اوپارے کہ ای بل پیش کننگ اُٹ اگہ نما نیت صاف ءِ تو تینا وونٹ ءِ ایتے و سویلی پنجاب ءِ حق ترفے۔ شاہ محمود قریشی پارے کہ ای 19 جنوری آ چٹھی اس نوشتہ کریٹ نی ورندی ءِ تننگ نا زحمت کتویس، ای بلاول بھٹو و شہباز شریف ءِ اینو دُوارہ چٹھی اس نوشتہ کرینٹ۔ اوپارے کہ یواین ڈی پی نا ہرا رپورٹ بسنےاوکنا موقف ءِ پک کرینے کہ سویلی پنجاب غٹ آن زیات پسماندہ ریجن ءِ، ای شہباز شریف ءِ ہم یو این ڈی پی نا غٹ حساب وکتاب آتے مون تسونٹ۔ کنا شہباز شریف آن خواست ءِ کہ سویلی پنجاب نا باندات آ سنجیدگی اٹ سجفے، سویلی پنجاب نا راستکی تے مون آ تخسا مون آ ہنوئی مریک، اگہ بلاول بھٹو و شہباز شریف تینا سیاسی فائدہ غاتے ہم ملحوظ خاطر تخر تو اوفک سویلی پنجاب نا جوڑ کننگ و تخلیق اٹ اڑاند مفس۔
