اسلام آباد۔ 11 فروری (اے پی پی) وزیرخارجہ مخدوم شاہ محمود قریشی تون انٹرنیشنل لیبر آرگنائزیشن نا ڈائریکٹر جنرل نا عہدہ کن جمہوریہ کوریا نا اومیتدار کانگ کیونگ وانے جمعہ نادے آ وزارت خارجہ ٹی اوڑدہی کرے۔ وزیرخارجہ پارے کہ گچین سفارتکار، مسکوہی وزیر خارجہ و سیاستدان مننگ نا ناطہ نا آزموندہ متاثرکن و ایشیا پیسیفک ریجن آن تعلق تخوک آ آزموندہ کار زالبول اومیتدار نا وڑاٹ ، نی آئی ایل اوں نا کماشی کن سوگو اومیتدار اُس۔ شاہ محمود قریشی پارے کہ جنیوا ٹی تدوک آ تُو مروک آ السی سماعت اٹی نا نقطہ نظر و ولیت آتا درشانی ستاکڑزک، کورونا دین نا جہانی دین دنیا نا زرگزران ءِ بھاز بے وڑ زہمی کرینے وخت اس کہ ملازم، کارندہ و آجردادینی مرض آن اسہ وڑاٹ زہمی مسنو۔ شاہ محمود قریشی پارے کہ مناسب شونداری فنانسنگ و ویکسین ایکویٹی، زرگزرانی بحالی کن کمکار مریک۔ پاکستان، آئی ایل او گورننگ باڈی نا باسک نا وڑاٹ ، دا اہم جہانی اولیت آتیکن تینا مخ تفی ءِ برجاتخک، نن بروک آ ڈائریکٹر جنرل آئی ایل او تون شونداری فنانسنگ، وام آن نجات، ویکسین ایکویٹی و انصاف اٹ مالیاتی پنجر نا جوڑ کننگ، راجی و اقتصادی بے بریبری نا مقابلہ ءِ کننگ کن تینا گچین کڑد ءِ ادا کننگ نا اومیت تخک۔ انٹرنیشنل لیبر آرگنائزیشن نا ڈائریکٹر جنرل نا عہدہ کن جمہوریہ کوریانا اومیتدار کانگ کیونگ وانے توصیفی جملہ غاتیا وزیر خارجہ مخدوم شاہ محمود قریشی نا منت واری ءِ ہرفے۔
