اسلام آباد۔ 11 فروری (اے پی پی) بنجائی وزیر خزانہ شوکت ترین پارینے کہ ملکی برآمد آتیٹی ودکی مننگ ءِ، زررادہ کننگ ودنگ ءِ، جنوری ٹی واپاری نسخان اٹی 1.5 ارب ڈالر نا کمتی مسنے، فروری و مارچ اٹی پین کم مریک۔ جمعہ نادے آ بڑزکو ایوان نا دیوان اٹی وقفہ سوج آتے ٹی رخسانہ زبیری، جام مہتاب ، افنان اللہ و مشتاق احمد نا سوج آتا ورندی ٹی او پارے کہ دنیا ٹی شرح سود ودنگ ءِ، سنگت ملک آتیان ہرا وام تے ہلنگانے او آئی ایم ایف و ایلو ادارہ غاتا شرح سود انا نسبت کم ءُ۔ اوپارے کہ برآمدات و زررادہ کننگ اٹ ودکی و اسٹیٹ بینک نا زرمبادلہ نا کوڑی تا ودنگ آن اومیت ءِ کہ سنگت ملک آتیان ہلوک آ وام تیٹی ودکی کرفوئی تمپک۔ اوپارے کہ دنیا ٹی پٹرولیم مصنوعات، کنوئی آ تیل، کولا و اسٹیل نا نہاد آتیٹی ودکی مسنے، اِرا ارب ڈالر نا ویکسین درآمد کننگانے ، خولم و بورہ ہم درآمد کننگانے، داکان بیدس دال ہم درآمد کننگ اُن، روپئی نا قدر اٹی سوگوی بسنے، سعودی عرب آن موخر ادائیگی تا آسراتی داسکان نن کاریم اٹ اٹتنون، بروک آ تُو آن دادے کاریم اٹ اتنگ بناکیک۔ اوپارے کہ پاکستان ایف اے ٹی ایف نا 28 آن 27 ہدف آتے پورو کرینے، بیرہ اسہ شڑت اسے نا سوب آن ننے شست کننگ انگ ءِ و ننا زی آ زور شاغنگ انگ ءِ، داننتون زیادتی اسے، ننا جاگہ غا پین ملک اس مسکہ تو بیرہ اسہ شڑت انا سوب آن اودے گرے لسٹ اٹ تخنگتوکہ، اومیتءِ کہ پاکستان گرے لسٹ آن بروک آ جاچ اٹ پیش تمے۔
