اسلام آباد۔ 11 فروری (اے پی پی) پاکستان اٹی کینیڈا نا براہ راست درملکی زرکاری ٹی برجامالی سال اناا ولیکو ششماہی ٹی تدوک آ مالی سال انا ہند امد انا مقابلہ ٹی نمان ودکی ریکارڈ کننگانے۔ اسٹیٹ بینک و زرکاری بورڈ انا کنڈآن دا بابت دوئی حساب وکتاب نا رداٹ مالی سال انا اولیکو ششماہی ٹی پاکستان اٹی کینیڈا نا براہ راست درملکی زرکاری نا کچ 9.8 ملین ڈالر ریکارڈ کننگا ہرا تدوک آ مالی سال انا ہندا مد انا مقابلہ ٹی 122.72 درسد زیات ءُ، تدوک آ مالی سال انا ہند امد اٹی پاکستان اٹ کینیڈا نا براہ راست درملکی زرکاری نا کچ 4.4 ملین ڈالر ریکارڈ کننگاسس۔ دسمبر 2021اٹی پاکستان اٹی کینیڈا نا براہ راست درملکی زرکاری نا کچ منفی 1.4 ملین ڈالر ریکارڈ کننگانے۔ حساب وکتاب نا رداٹ مالی سال انا اولیکو ششماہی ٹی پاکستان اٹی کینیڈا نا پورٹ فولیو زرکاری نا کچ 9.2 ملین ڈالر ئس ہرا تدوک آ مالی سال انا ہندا مد اٹی 4.8 ملین ڈالر ئسک۔ اولیکو ششماہی ٹی ملک اٹی براہ راست درملکی زرکاری نا کچ 651.1 ملین ڈالر ریکارڈ کننگانے۔
