اسلام آباد۔ 10 فروری (اے پی پی) وزیراعظم عمران خان پارینے کہ گورننس نا مسخت الس نا زند اٹی گچینی اتنگ ءِ، جزا وسزا آن بیدس اسہ سسٹم اس ہم سرسہب مننگ کپک، گچین کارکڑد نشان تروک آ وزارت آتے بونس وآسراتی تننگک، ویل آتا ایسری کن غیرروایتی سوچ و طرز عمل اس اختیار کروئی مریک، نیب اٹی اصلاحات آن پد بیوروکریسی تون کاریم کپننگ نا ہچ ءُ بہانہ اس اف۔ داخیال آتا درشانی ءِ او پنچ شنبے نادے آ داڑے گچین کارکڑد نشان تروک آ 10 بنجائی وزارت آتیٹی سفتی سند بشخنگ نا دود آن تران کرسا کرے۔ داوخت آ بنجائی وزیرآک، خصوصی کمکارآک، بنجائی وزارت آتا سیکرٹریک و بڑزکو سرکاری کمامدارآک ہم ساڑی ئسر۔ وزیراعظم دود اٹی گچین کارکڑد نشان تروک آ وزارت ہرافتے ٹی وزارت مواصلات، ڈٹ بندی و شونداری، تخفیف نیزگاری، بنجائی تعلیم، انسانی حق ، صنعت و پیدوار، قومی سلامتی ڈویژن ، واپار ، داخلہ و قومی غذائی رکھ اوار ءُ، ٹی سفتی سند بشخا۔ وزیراعظم وزارت آتا کارکڑد ءِ ہُننگ نا نظام ءِ لاگو کننگ آ ارباب شہزاد و اونا ٹیم ءِ مبارکبادی تس۔ وزیراعظم پارے کہ آخبت دود انا اڈتننگ آن مست گچین کارکڑد نشان تروک آ وزارت آتا پن تے افشانہ کننگے تانکہ غٹ وزیر آک دود اٹی ساڑی مریر و اوفتا وزارت آتا کارکڑد غٹ انا مون آ آشکار مسکہ کہ ہراوزارت آتا کارکڑد زیات جوان اف و ہرامنسٹرآک کاریم کتنو، اوفتے ٹی کاریم کننگ نا تحریک ودی مرے۔ وزیراعظم پارے کہ اسہ سسٹم اس ہم جزا و سزا غان بیدس سرسہب مننگ کپک۔ وزیراعظم نجی بشخ انا ہسپتال آتا درور اس تس ہرافتے ٹی تنخواہ و آسودہی سرکاری ہسپتال آتیان کم ءِ ولے اوفتا کارکڑد گچین ءِ انتئے کہ ہموڑے شونداری و آسراتی سنیارٹی نابنداو آ خا بلکن کارکڑد نا بنداو آ تننگک۔ وزیراعظم پارے کہ حکومت کارکڑد ءِ ہُننگ نا نظام اس مون آ ایسونے ہراڑآن سرکاری ادارہ غاتا کارکڑد و گورننس اٹی گچینی بریک۔ وزیراعظم مواصلات نا بنجائی وزیر مراد سعیدءِ گچین کارکڑد آ مبارکبادی ترسا پارے کہ او ورناءُ وزیر اسے و او گچین کاریم کرینے۔ وزیراعظم پارے کہ ملک ءِ خودانحصاری نا کنڈآ دننگ کن وزارت آتا کڑد اہم ءِ، ننے برآمد آتے ودفنگ و ملک ءِ تینا نت تینا سلفنگ کن گام گیج کروئی مریک، الس نا زند ءِ گچین کننگ و اوفتے نیزگاری آن کشنگ ننا مشن ءِ ، ویل آتا ایسری کن روایتی سوچ آن پیش تمسا غیرروایتی سوچ و طرزعمل اس اختیار کروئی مریک۔ وزیراعظم پارے کہ گچین کارکڑد نشان تروک آ وزارت آتے بونس تننگک، بے پرخ غٹ ءِ آسراتی تننگ نا نظام اس بایدے مرے۔ اووزارت آتے پارت کرے کہ او الس نا زند انا آب ءِ گچین کننگ کن گام گیج سجفر۔ وزیراعظم پارے کہ نیب اٹی اصلاحات آن پد داسہ بیوروکریسی تون کاریم کپننگ نا ہچ ءُ بہانہ اس اف۔
