پاک چین تعلقداری الس اسکان سرمسنے، شیف و بڑزی آن ایڑتر تعلقداریک بریبربرجاءُ، پاکستان وچین دُوارہ سرد جنگ انا دورہ ءِ خواپسہ، کمک کننگتو تو اوغانستان اٹی بھلو المیہ اس ودی مننگ کیک، وزیراعظم عمران خان نا خصوصی انٹرویو

اسلام آباد۔ 10 فروری (اے پی پی) وزیراعظم عمران خان پارینے کہ پاک چین تعلقداری الس اسکان سرمسنے ، شیف و بڑزی آن ایڑتر تعلقداریک بریبر برجاءُ، پاکستان وچین دُوارہ سرد جنگ انا دور ءِ خواپسہ، امریکہ و چین نا نیام اٹ بدخواہی نا جاگہ غا جوانی کن گوتفر، دا بابت پاکستان مستین آنبار تینا مثبت کڑد ءِ ادا کننگ خواہک، کنا اولیت تینا ملک اٹی کانود نا حکمرانی و تینا الس ناراجی آسراتی ءِ ، جیو اکنامکس آ چکار کرینن، تینا مخلوق ءِ نیزگاری آن کشنگ کن چین ننکن درور اسے، بھارتی حکومت دا تکک کہ بھارت بیرہ ہندو تیکن ءِ وخت اس کہ ایلو مذہب آتا منوک آتے پین درجہ سے نا شاری تکک ، بھارت کشمیری تے حق خودارادیت تننگ آن انکار نا سوب آن زیات نسخان ہرفک، اوغانستان اٹی امریکہ نا مسخت آتا پیدوار مفننگ نا سوب آن اودے بے سہب مروئی ہی ئسک، اوغانستان نا کمک ءِ کننگتو تو انسان نا ودی کروک غٹ آن بھلا المیہ ودی مننگ کیک۔ داخیال آتا درشانی ءِ او فودان یونیورسٹی چین نا ڈائریکٹر ءِ خصوصی انٹرویو ترسا کرے۔ وزیراعظم پارے کہ ای اِرا دہائی اسکان جہانی کرکٹ اٹ گوازی کریٹ، دا گوزی گراسے نا جہانی گوازی تیٹی بھلو کیریئر اس ئسک۔ اوپارے کہ ہراجہانی گوازی مریک او ایلو ماندہ زند ءِ کمنٹیٹر یا کوچ جوڑ مرسا یا میڈیا ٹی ہنسا گدریفک و اوڑکن بھاز وارخواہی مریک ولے ہراتم ای ریٹائر مسٹ تو ای ولدا اسُل کرکٹ نا کنڈآ دُوارہ ہِننگ خواتوٹہ۔ وزیراعظم پارے کہ خداننے بے تحاشہ لائخی تسنے ولے دالائخی تون نم ہموتم انصاف کننگ کیرے ہراتم نم تینے چیلنج کیرے، ہنداوڑ نم زند اٹی پین بڑزا کارے و ہنداوڑ نم تینے چیلنج کننگ ءِ ہلرے تو نم روبہ زوال مریرے، اللہ تعالیٰ نن انسان تے ہنداوڑ ودی کرینے، ای مدام تینا گوازی تا کیریئر چٹنگ آن پد اوڑآن کنارہ کش مننگ خواہسوٹہ، ای اوزند اتون گنڈنگ خواتوٹہ، ہنداخاطرآن گوازی آن کنارہ کش مننگ آن پد اول کینسرہسپتال اس جوڑ کریٹ انتئے کہ ہمووخت آپاکستان اٹ کینسر نا ہچ ءُ ہسپتال اس الوکہ، و شوکت خانم ملک انا غٹ آن بھلا خیراتی ادارہ ہم ئس و اینو ہم ارے و داسہ ای عطیہ غاتیان ارٹ میکو کینسر ہسپتال ءِجوڑ کرینٹ  و و داسہ مسٹ میکو ہسپتال نا تفنگ نا عمل اٹی اُٹ، داکان بیدس اِرا یونیورسٹی ہم جوڑ کرینٹ و دا غٹ خیراتی ءُ، ہچ ءُ کاروباری ادارہ اس اف۔، بنداوی وڑاٹ دا ہمومخلوق کن ءُ ہرایونیورسٹی نا آب اٹ تعلیم نا خڑچ و کینسر نا درمان نا خڑچ آتے سگنگ نا قابل افس۔ وزیراعظم پارے کہ شوکت خانم ہسپتال آن کم و ود 75 درسد مخلوق کینسر نا مفت درمان کرفک و یونیورسٹی تیٹی 90 درسد طالب علم مفت تعلیم دوئی کیرہ۔ وزیراعظم پارے کہ ای ہندا سمت اٹ مون آ ہناٹہ، ولدا ای سیاست اٹ ہِننگ نا فیصلہ کریٹ انتئے کہ کنے احساس مس کہ گڑاس بگڑینگوک سیاست دان ننا ملک ءِ بھس کننگ ءُ، کنا ایمان ءِ کہ ملک نیزگار بیرہ وڈی خوری نا سوب آن ءِ، وڈی خوری کانود نا حاکمیت مفننگ نا اسہ نشانی اسے، ہندن ءُ ملک اس ہرا تینا واکدار ءِ کانود نا تابع اتنگ کپک’’ بنانا ریپبلک ‘‘ جوڑ مریک و اونا الس نیزگاری نا گواچی مریک، ہنداسوب ءِ کہ ای سیاست اٹ بسٹ، کنا منشور اِرااصول آتیا ئسک اسٹ کانود نا حکمرانی و ایلو پاکستان ءِ آسودہی ریاست اس جوڑ کننگ، ہند اسوب ءِ کہ 25 سال مست ای سیاست اٹ بسٹ، ای 22 سال نا جہد آن پد آخرکار دا منصب اسکان سرمسٹ۔ اوغانستان نا حالیت آتا بابت اسہ سوج اسے نا ورندی ٹی وزیراعظم پارے کہ امریکیک اوغانستان نا تاریخ نا مطالعہ ءِ کتوس، اسہ کہاوت اسے کہ ہرامخلوق تاریخ آن سبخ ہلپک اواودے دُوارہ کرسا برباد مریک، ہنداخاطرآن ہرکس کہ اوغانستان نا تاریخ ءِ چاہک او داوڑ کتوکہ ہراوڑ امریکہ کرے، او ہمو بندغ ئسٹ ہرا اولیکو دے آن پارسا بننگ اُٹ کہ امریکی اوغانستان اٹی اسُل سرسہب مفسہ ، اوفتے سمجھ ہی الوکہ کہ او اوغانستان اٹی دوئی انت اس کننگ خوارہ، آیا قوم اس ٹہیفنگ خوائسرہ یا او جمہوریت اتنگ خوائسرہ یا او اوغان زالبول آتے آجوئی ترفنگ کن بسوسر، اوفتا ہچ ءُ پیدوار ءُ مسخت اس ہی الوکہ، اگہ گڑاس ئس تو ہراتم اسہ وار اسامہ لادن ءِ امریکیک خلکوسر تو بایدے اوفتا مشن چٹوسس انتئے کہ بظاہر تو او بیرہ القاعدہ تون جنگ تننگ کن بسوسس ولے القاعدہ تو اوغانستان اٹی مہالو اِراسال ہی چٹفنگاسس تو اوکان پد و ہموڑے انت اس کریرہ، امریکی تیان اسٹ اس ہم تِتوکہ کہ اوہموڑے انت کریرہ۔ وزیراعظم پارے کہ چین ، پاکستان ہمسایہ، یورپی ملک آتون اوار غٹ ءِ کاریم ءِ المی کروئی مرے اودادے کہ امریکی تے قائل کیر کہ اوغانستان نا بابت مون آ ہِننگ نا دا وڑاف انتئے کہ اگہ اوغانستان اٹی افراتفری مریک تو او سوب ہراڑکن امریکہ بنداوی وڑاٹ اوغانستان نا رخ ءِ کریسس او دہشت گردی ئس و اگہ اوغانستان اٹی ہڑدڑمریک و طالبان حکومت نزور مریک تو او آئی ایس آئی ایس (داعش) کون آ جہانی دہشت گرد پڑک آتا مقابلہ ءِ کننگ نا قابل مفک۔ اسہ سوج اسے نا ورندی ٹی وزیراعظم پارے کہ کنا اولیت پاکستان نا 22 کروڑ الس ءِ ، ننا آبادی نا کم و ود 25 آن 30 درسد نیزگاری نا لکیر آن شیف ءُ، پاکستان اٹ نن تدوک آ 30 سال اٹی خاص وڑاٹ روبہ زوال مسونن، اِرا خاہوت آتا ملک ءِ پُلنگ کن واری ہلنگ نا سوب آن و ولدا یقینا دہشت گردی نا برخلاف امریکہ نا جنگ انا بشخ مننگ نا سوب آن ، ہرا پاکستان کن تباہ کن ثابت مس، پاکستان ءِ اسُل جنگ اٹی بشخ ہلوئی الوکہ، ہراڑے امریکہ ءِ نائن الیون آن پد آن 20 سال اٹی اِرٹ، مسٹ یا چار ہزار مخلوق نا نسخانءِ سگوئی تما، پاکستان ءِ 80 ہزار بندغ آتا جانی نسخان مس و ننے زرگزران اٹ 150 ارب ڈالر آن زیات نا نسخان مس ، ننا اولیت داوخت آ تینا مخلوق نا خیالداری ءِ کننگ ءِ، کنا حکومت نا مچ آ زور جیواکنامکس آٹے، نن تینا زرگزران ءِ گچین کننگ خواہنگ اُن و تینا مخلوق ءِ نیزگاری آن کشنگ خوانہ، داڑکن نن چین آن ہیل کننگ خوانہ ہرا دے چین دوئی کرے۔ اسہ سوج اسے نا ورندی ٹی وزیراعظم پارے کہ امریکہ ہم پاکستان نا جوان انگا سنگت ءِ ولے دا چین آنبار ناسنگتی اف ہرا حالیت آتا شیف و بڑزی آن ایڑترمرے، ہندن ءُ ہم وخت اس ئس ہراتم ننا امریکہ تون بھاز دوستانہ تعلقداری ئس، ولدا ہراتم پاکستان نا ضرورت متو تو او پاکستان آن کنارہ کشی اختیار کرے، اوکان پد ولدا دوستانہ تعلقداری بحال مس، درور نا وڑاٹ پاکستان اوغانستان اٹی سوویت یونین نا برخلاف جنگ اٹ صف اول اٹی ئس، ہمووخت آ پاکستان امریکہ نا سنگت مس، اوننا کمک ءِ ہم کرے و او ننتون بھاز جوان ئس، ہندن کہ سوویت یونین اوغانستان آن ہنا تو او ننے آ پابندی خلک، دہ سال آن پد ہراتم نائن الیون مس ولدا اونا ننتون گچین تعلقداری جوڑ مس و ہراتم او اوغانستان اٹی سرسہب مننگ کتو تو داشکست نا زموار ننے گوندا، ننا امریکہ تون ہمووڑتعلقداریک سلتوس ہراوڑ چین اتون ءِ، چین اتون 70 سال آن ننا شیف و بڑزی آن ایڑتر تعلقداری بریبر برجاءِ، پاکستان ہر فورم آ چین اتون سلیسنے و چین وخت اس ہم پاکستان ءِ ضرورت تما ننتون تفے، چین اتون ننا تعلقداری السی کہول آ سرمسنے ، داسہ الس نا الس تون رابطہءِ ، داڑآن ہچ ءُ پرخ اس تمپک کہ پاکستان اٹ دیر اس اقتدار اٹی ءِ، ہرکس کہ داڑے اقتدار اٹی بریک مدام اونا چین اتون خڑکی تعلقداری مریک انتئے کہ ہڑتوم آ ملک آتا سنگتی الس اٹی ءِ۔