اسلام آباد۔ 10 فروری (اے پی پی) اقتصادی سفارتکاری نا بابت اہم ءُ دیوان اس وزیرخارجہ مخدوم شاہ محمود قریشی نا کماشی ٹی پنچ شنبے نادے آ وزارت خارجہ ٹی اڈ ہلک۔ دیوان اٹی سیکرٹری خارجہ سہیل محمود، اسپیشل سیکرٹری خارجہ رضابشیر تارڑ، سعودی عرب کن پاکستان نا پندار سفیر امیر خرم راٹھور و وزارت خارجہ نا سینئر آفیسر آک بشخ ہلکر۔ نیویارک و جنیوا ٹی پاکستان نا آخبتی مندوبین ایمبیسیڈر منیر اکرم و ایمبیسڈر خلیل ہاشمی و امریکہ ٹی پاکستان نا سفیر ایمبسیڈر اسدمجید بذریعہ ویڈیو لنک دیوان اٹی بشخ ہلکر۔ داکان بیدس واشنگٹن کن پاکستان نا پندار سفیر سردار مسعود خان ہم دیوان اٹی بشخ ہلک۔ وزیرخارجہ شاہ محمود قریشی پارے کہ پاکستان نا زرگزرانی سوگوی کن نن اقتصادی اولیتی ایجنڈا غا چکار کرینن، اقتصادی سفارت کاری ننا اولیتی ایجنڈا ءِ۔ اوپارے کہ ننا حکومت اولیکو وار جامع قومی سیکورٹی پالیسی اس مون آایس۔ ننا قومی سیکورٹی پالیسی نا فوکس، اقتصادی اولیت آتیا عملدرآمد و اقتصادی ہدف آتا دوئی کننگ آٹے۔ وزیرخارجہ اقتصادی سفارت کاری ءِ گچین وڑاٹ مون آ دننگ کن سینئر سفیر آتا کنڈآن مون آبروک آ سلاہ تا ستاءِ کرے و پارے کہ وزیراعظم عمران خان نا وژن ءِ مون آتخسا وزارت خارجہ ٹی اقتصادی سفارت کاری ڈویژن نا زوت ٹہیفنگ کن سنبرینگوک اُن۔
