العربیہ و رمضان شوگر ملز منی لانڈرنگ کیس، عدالت شہباز شریف نا وکیل نا مرغن ءُ تاریخ اس تننگ نا خواست ءِ مسترد کرے، دوبہ دار آتا عبوری ضمانت اٹ 18 فروری اسکان ودکی

لاہور۔ 10 فروری (اے پی پی) لاہور نا اسپیشل سینٹرل عدالت العربیہ و رمضان شوگرملز انا بابت جعلی اکاؤنٹ اٹی منی لانڈرنگ کیس اٹ شہباز شریف و حمزہ شہباز نا عبوری ضمانت اٹ 18 فروری اسکان ودکی کرسا بروک آ سماعت آ ہڑتوم آ دوبہ دار آتے فرد جرم نا کارروائی کن بٹنگا۔ عدالت شہباز شریف نا وکیل نا کنڈآن مرغن ءُ تاریخ اس تننگ نا خواست ءِ مستر د کرسا باور کرفے کہ بروک آسماعت آ فرد جرم عائد کننگک۔ اسمبلی سیشن مس تو شہبازشریف حاضری آن معافی نا درخواست تننگ کیک۔ اسپیشل سینٹرل کورٹ انا جج اعجاز اعوان شہباز شریف و اونا مار حمزہ شہباز نا عبوری ضمانت آتیا سماعت کرے۔ پنچ شنبے نادے آ سماعت آ شہباز شریف و حمزہ شہباز تینا عبوری ضمانت آتا معیاد آتا چٹنگ آ عدالت اٹ ودکی کن پیش مسر و تینا حاضری ءِ خلفیر۔ سماعت اٹی شہباز شریف و حمزہ شہباز ءِ مقدمہ نا چالان نا نقل فراوان کننگا۔ عدالت ہڑتوم آ دوبہ دار آتا عبوری ضمانت آتیٹی 18 فروری اسکان ودکی کرسا بروک آ سماعت آ شہباز شریف و حمزہ شہباز ءِ فرد جرم ناکارروائی کن بٹنگا۔