اسلام آباد۔ 10 فروری (اے پی پی) مواصلات نا وزارت گچین کارکڑد نشان تروک آ وزارت آتیٹی اولیکو نمبر آ ئس۔ پنچ شنبے نادے آ داڑے اڈ ہلوک آ دود اٹی وزیراعظم عمران خان گچین کارکڑد نشان تروک آ 10 بنجائی وزارت آتیٹی سفتی سند بشخا۔ مواصلات نا وزارت نا کنڈآن بنجائی وزیر مراد سعید و سیکرٹری مواصلات سفتی سند آتے ہلکر۔ وزیراعظم عمران خان مواصلات نا وزارت نا گچین کارکڑد آ بنجائی وزیر مراد سعید ءِ شاباشی تس و پارے کہ او غٹ آن ورناانگا وزیر ءِ، اوگچین کارکڑد نشان تس۔ پلاننگ اینڈ ڈویلپمنٹ نا وزارت نا کنڈآن اسد عمر، تخفیف غربت نا کنڈآن ڈاکٹر ثانیہ نشتر ، تعلیم نا وزارت نا کنڈآن تعلقدار بنجائی سیکرٹری، انسانی حق انا وزارت نا کنڈآن بنجائی وزیر شیریں مزاری ، صنعت وپیدوار نا کنڈآن بنجائی وزیر خسروبختیار، نیشنل سیکورٹی ڈویژن نا کنڈآن وزیراعظم نا سلاہکارقومی سلامتی ڈاکٹر معید یوسف، کامرس اینڈ ٹریڈ نا کنڈآن وزیراعظم ناسلاہکار عبدالرزاق داؤد، وزارت داخلہ نا کنڈآن بنجائی وزیر شیخ رشید احمد وقومی غذائی رکھ انا وزارت نا کنڈآن فخرامام وزیراعظم آن سفتی سند آتے ہلکر۔ وزیراعظم نا خصوصی کمکار اسٹیبلشمنٹ شہزاد ارباب داوخت آ وزیراعظم ءِ بنجائی وزارت آتا کارکڑد نا بارواٹ معلومدار کرے۔ اوپارے کہ پرفارمنس ایگریمنٹ نا نظام گچین گورننس نا وڑاٹ مون آ بسنے، دانا رداٹ کارکڑد ءِ ہُننگ نا سادہ و آسان وڑوڈول اس مون آ اتنگانے، پنچ وزارت آتا کارکڑد 90 درسد آن زیات مسنے۔ اوپارے کہ اولیکو وار کارکڑد نا بنداو آ وزارت آتا رینکنگ کننگ انگ ءِ۔
