اسلام آباد۔ 10 فروری (اے پی پی) پاکستان اٹی انڈونیشیا نا سفیر ایڈم ملاوآرمن ٹوگیو پارینے کہ پاکستانی پوریاگر آک انڈونیشیا و آسیان ملک آتا مون آ بروک آ منڈی تیتی واپار و زرکاری نا مون آ دننگ اٹ تینا پبی کڑد ءِ ادا کیر۔ اوداہیت ءِ راولپنڈی ایوان صنعت وواپار نا ڈل انا شرف اٹی تروک آ سوارہ غان تران کرسا پارے۔ داوخت آ راولپنڈی چیمبر آف کامرس اینڈ انڈسٹری نا صدر چوہدری ندیم اے روف گروپ لیڈر سہیل الطاف، چیمبر نا سینئر نائب صدر عاصم ملک، نائب صدر چوہدری ندیم اے روف، چیمبر نا مسکوہی صدر طلعت محمود اعوان، مسکوہی صدر محمد ناصر مرزا، مسکوہی صدر سید اسد مشہدی و ممبر ایگزیکٹیو کمیٹی عثمان شوکت ئسک ہم ساڑی ئسر ۔ اوپارے کہ انڈونیشیا نا 1 ٹریلین ڈالر نا پیدواری مارکیٹ اٹی پاکستانی پوریاگر برادری کن واپار و زرکاری نا رداٹ انڈونیشیائی پوریاگر آتون ہڑتوم آ کنڈآتا واپاری تعلقداری ءِ ودفنگ کن بھلو وارخواہی اس ساڑی ءِ، ہراڑآن ہڑتوم آ ملک آتا پوریاگر برادری ءِ فائدہ مننگ کیک۔ اوپارے کہ پاکستان و انڈونیشیا نا نیام اٹ سیل وسوات، واپار، ای کامرس و دفاع سیل و سوات ، واپار، ٹیکسٹائل ، آٹو موبائل، فارماسیوٹیکل وای کامرس تون اوار غٹ بشخ آتیٹی کمکاری نا بھلو گمان اس ارے۔ انڈونیشیا ٹی سیل و سوات و مہمانداری نا پبی کلچر ءِ و حکومت دا بشخ ءِ سالانہ قومی کٹیا نا 10 درسد اسکان ودفنگ خواہک ولے کوویڈ۔ 19 نا ساڑی آ ریسہ نا سوب آن نن تینا مسخت آتے دوئی کننگ اٹ سرسہب مننگ کتون، ننا ملک سیل و سوات نا بشخ اٹی ہدف آتے پورو کننگ نا پورو کوشست کننگ ءِ، انڈونیشیاٹی بالی و پین زیباءُ جزیرہ ءُ ہرا جہانی سیل و سوات نا ہند ءُ۔ پاکستان آن سیل و سوات کن انڈونیشیا غا ہنوک آتیکن بھاز انگا پرکشش وارخواہی ساڑی ءِ۔ انڈونیشیا تینا سیل وسوات ءِ مون آدننگ کون آ آزموندہ غاتے پاکستانی تتون شیئر کننگ کیک و دا چرجوئی ٹی ہڑتوم آ ملک آتا نیام اٹ کمکاری نا پوسکن ءُ کسر ملنگ کیک۔ اوپارے کہ پاکستان و انڈونیشیا نا شمار دنیا نا زیبا انگا ملک آتیٹی مریک و ہڑتوم آ ملک آک اسہ ایلو نا آزموندہ غاتیان فائدہ ہرفنگ کیرہ۔ اوپارے کہ انڈونیشیا ٹی آٹو موبائل سیکٹر کارتا پیدوار اٹی بھاز کاریم کننگ ءِ و انڈونیشیا کاروپین چنکو چنکو گاڈی ہم دوئی کننگ ءِ۔ دا چرجوئی ٹی جاپان نا کمک اٹ آٹوموبائل نا بشخ اٹی بھاز کاریم مننگ ءِ۔ راولپنڈی چیمبر نا صدر چوہدری ندیم اے روف پاکستان و انڈونیشیا نا نیام اٹ دواجوڑ کننگ و آٹو موبائل تون اوار چندی بشخ آتیٹی کمکاری ءِ ودفنگ آ زور شاغا۔ اوراولپنڈی چیمبر نا کنڈآن انڈونیشیا ٹی بزنس کانفرنس نا اڈتننگ نا سلاہ ہم پیش کرے ہراڑآ فریق آک گپ وتران آ امنائی سلاہ کریر۔
