وزیراعظم عمران خان نا قومی جان جوڑی کارڈ انا بناءِ کننگ نا دود آن تران

فیصل آباد۔ 09 فروری (اے پی پی) وزیراعظم عمران خان پارینے کہ راج کانود نا بالادستی و حکمرانی اٹ شون ہلیک، پاکستان بھلا دُز آتے سزا ملپننگ نا سوب آن بھس مس، مستین اٹ کرپٹ حکمرانک الس ءِ جان جوڑی کون آ بنداوی آسراتی تیان ہم محروم تخار، تینکن جتا پاکستان اس جوڑ کریر و تینا جکہ نا درمان ہم دبئی، امریکہ و لندن آن کرفیرہ۔ پاکستان جوڑ کننگ نا مسخت دا الوکہ کہ ٹاٹا و برلانا جاگہ غا شریف و زرداری بریر، 30 سال اسکان ملک آ حکمرانی کروک آ، الس ءِ اوفتا حق آن محروم تخوک آ و پڈ ءِ چیروک آ پیسہ کشنگ نا دعویٰ کروک آ غٹ بھلا دُز آک اینو کنا برخلاف یکجا مسنو۔ ای دا ملک اٹی کانود نا بالادستی کن جنگ تننگ اٹی اُٹ، کرپٹ مخلوق نا مقابلہ ءِ کننگ کن بسونٹ و دا کوزہ پڑک و ظالم تے کانود نا شیف اتیوہ، داہنداخاطرآن کنے آن خلیرہ و خوارہ کہ کنا حکومت زوت چٹے ولے پاکستان داسہ سہی کسر آ چلینگ نا بناءِ کرینے و ننا حکومت ہندن ءُ نظام اس اتنگ ءِ ہراٹی زورآور اس نزور نا حق ءِ خلنگ کپ۔ اوچار شنبے نادے آ داڑے فیصل آباد ڈویژن اٹی پوسکن آ پاکستان قومی جان جوڑی کارڈ انا بنانا دود آن تران کریکہ۔ داوخت آ وزیراعلیٰ پنجاب سردار عثمان بزدار، بنجائی وزیر اسد عمر، شفقت محمود، وزیر مملکت حوالکاری و شینکاری فرخ حبیب، وزیراعظم نا خصوصی کمکار شہبازگل ، وزیر جان جوڑی پنجاب ڈاکٹر یاسمین راشد و ایلوفک ہم ساڑی ئسر۔ وزیراعظم پارے کہ جان جوڑی کارڈ پاکستان ءِ ریاست مدینہ نا اصول آتا رداٹ جوڑ کننگ نا چرجوئی نا کڑی اسے ، صوبہ اسے کن 400 ارب روپئی نا ہیلتھ انشورنس فراوان کننگ آسان اف، 74 سال انا تاریخ اٹی اخس صدر ووزیراعظم بسر ولے کس اس الس ءِ دا آسراتی فراوان کننگ نا بارواٹ سجفتوس، نیزگار مخلوق کینسر و است انا مرض اتون اوار ہراتم چندی ناجوڑی تیٹی اختہ مسکہ تو درمان نا خڑچ ءِ سگپننگ نا سوب آن مرک انا باٹی ہناکہ ولے داسہ ریاست الس نا جان جوڑی نا زمواری ءِ ہلکونے و نیزگار مخلوق دا جان جوڑی کارڈ انا سوب آن ہرہسپتال آن تینا درمان ءِ کرفنگ کیک۔ وزیراعظم پارے کہ برصغیر نا مسلمانک پاکستان ءِ جوڑ کننگ کن جہدداخاطرآن کریسر تانکہ خواجہ نبی کریم صلی اللہ علیہ و آلہ وسلم نا رغاموک آتا رداٹ ریاست مدینہ نا وڑآ اسلامی آسودہی ریاست اس جوڑ کننگ مرے۔ وزیراعظم پارے کہ مستین اٹ حکمرانک و صاحب حیثیت مخلوق ہسپتال آتا آب ءِ گچین کننگ نا جاگہ غا تینکن جتا آسراتی دوئی کریر و سرکاری ہسپتال آتا آب تمسا ہنا۔ ہرافتا زمواری الس ءِ جان جوڑی نا آسراتی فراوان کننگ ئس او تینٹ جکہ نا درمان ءِ کرفنگ کن ہم پیشن کارہ و چیک اپ کن وخت اس امریکہ، وخت اس لندن و وخت اس دبئی آ سرمریرہ، اینو غٹ دُز آک ، ہرامہالو اسہ ایلو ءِ دُز پاریرہ و پڈ ءِ چیرسا پیسہ کشنگ نا ہیت آتے کریرہ یکجا مسنو، 30 سال ملک آ اوفتا حکومت ئس ولے اوفک الس کن ہچ اس کتور۔ پاکستان نا شمار ہمو ملک آتیٹی مریک ہراڑے آبادی نا کچ انا رداٹ غٹ آن کم ہسپتال، ڈاکٹرو نرس ءُ، ڈسٹرکٹ ہسپتال آتیٹی ڈاکٹر آک بفسہ، حکمران تپہ تیکن جتا ءُ پاکستان اس جوڑ کرینو، پاکستان جوڑ کننگ نا دا مسخت الوکہ کہ ٹاٹا و برلانا جاگہ غا شریف و زرداری بریر، کنا سیاست اٹ بننگ نا مسخت اِرا خاہوت ہرا ملک ءِ پلارہ ، نا برخلاف جہا دکننگ ئس، سندھ انا اسہ لیڈر اس ہراپاہک کہ زیات پِرمریک تو زیات دیر بریک۔ اینو پاننگ ءِ کہ ہیلتھ انشورنس آ پیسہ خڑچ کپنہ بلکن ہسپتال جوڑ کینہ تو ای اوفتیان اَریفیوہ کہ اوفک داتم اسکان انت اکن جوڑ کتویسر، دا لس بندغ نا ویل آتیان بلد ہی افس، داوخت اس ہم ایہن آ ہسپتال آتیان ہِنتنو، زرداری پیسہ اٹ مخلوق ءِ ہلیک، ای سیاست اٹ کرپٹ مخلوق نا مقابلہ ءِ کننگ کن بسونٹ ، داکرپٹ مخلوق نا مننگ تون پاکستان نا مسخت دوئی مننگ کپک، پاکستان اسلامی آسودہی نظریہ نا بنداو آ جوڑ مسوسس، خواجہ نبی کریم صلی اللہ علیہ و آلہ وسلم فرمائفیسس کہ مہالو قومک داخاطرآن بھس مسر کہ غریب دُزی کریکہ تو اودے سزا تسرہ ولے ہزگار ءِ ہلارہ، پاکستان بھلا دُزآتے سزا ملپننگ نا سوب آن بھس مس، ہر راج و قوم کانود نا بالادستی و حکمرانی اٹ مون آ کاہک، برطانیہ کون آ ملک اٹی وزیراعظم اسکان ءِ جوابدہ مروئی تمنگ ءِ ولے داڑے ہرافتا چپراسی، پاپڑ والا و ملازم آتا اکاؤنٹ اٹی کروڑ آ روپئی برسا کرے اوکانود آن ایڑتر ئسر۔ غٹ ءِ سماءِ کہ اوفتے تون دُزی نا پیسہ غاک ءُ، دا برطانیہ ٹی مسرہ تو کس اسے مون ءِ نشان تننگ کتورہ، داڑے پارلیمنٹ اٹ سلسا یک ونیم یک و نیم گھنٹہ نا تقریر کیرہ ہرا اصل اٹ ملازمت نا درخواست مریک تانکہ اوفتے اسہ پین موقع اس ملے۔ ہراملک اٹی دُن ءُ نظام اس مرے ہراٹی بیرہ چنکا دُز آتے ہلنگے و بھلاتے ہلنگپ، او ملک بھس مریک۔ وزیراعظم پارے کہ اسہ ڈوہدار اس ہرا پاریکہ کہ کنے است انا ناجوڑی ءِ و درمان کرفنگ آ پیشن ہناسس، او ہموڑے تینا فیکٹری تے ہُننگءِ و داڑے گڑاس وکیل پاننگ ءُ کہ اودے ولدا موقع اس ایتبو، اونا مچ آ وئی نا نابوی نا سزا ءِ چٹفبو۔