اسلام آباد۔ 09 فروری (اے پی پی) وزیرخارجہ شاہ محمود قریشی چارشنبے نادے آ چاڈانا تینا ہم منصب محمد زین شریف تون ٹیل فون آ رابطہ کرے۔ ہڑتوم آ وزیر خارجہ غاک ہڑتوم آ کنڈآتا کمکاری نا ساڑی آ وڑآ است جمی نا درشانی ءِ کرسا پاکستان و چاڈ انا نیام اٹ ہڑتوم آ کنڈآتا سیاسی ، سفارتی ، واپاری و دفاعی کمکاری ءِ ودفنگ آ امنا کریر۔ ترجمان دفترخارجہ نا رداٹ ہڑتوم آ وزیر خارجہ غاتا نیام اٹ ہڑتوم آ کنڈآتا تعلقداری، تین پہ تینی است خواہی نا بشخ آتیٹی کمکاری نا مون آ دننگ تون اوار اہم امور آ گپ وتران مس۔ وزیرخارجہ پارے کہ پاکستان و چاڈ انا نیام اٹ تین پہ تینی پت آ مبنی اسیجائی تاریخ و شریداری نا بنداو آ ہڑتوم آ کنڈآتا تعلقداری استوار ءِ۔ وزیرخارجہ اقوام متحدہ، افریقی یونین و او آئی سی تون اوار علاقائی و جہانی فورم تیا چاڈ انا مثبت و فعال کڑد انا ستاءِ کرے و چاڈ ہم منصب ءِ حکومت نا ‘اینگیج افریقہ’ پالیسی نا خدوخال آن معلومدار کرسا دا چرجوئی ٹی داتم اسکان کروک آ پبی گام گیج آتیان معلومدار کرے۔ اوپارے کہ پاکستان ‘انگیج افریقہ پالیسی’ نا رداٹ نیروبی و ابوجاٹی بالترتیب جنوری 2020و نومبر 2021اٹی اِرا علاقائی واپاری کانفرنس سرسہب اڈ تس۔ ہڑتوم آ وزیر خارجہ غاک ہڑتوم آ کنڈآتا کمکاری نا ساڑی آ وڑآ است جمی نا درشانی ءِ کرسا پاکستان و چاڈ انا نیام اٹ ہڑتوم آ کنڈآتا سیاسی، سفارتی ، واپاری و دفاعی کمکاری ءِ ودفنگ و تینا تعلقدار وزارت آتا نیام اٹ پدریسہ رابطہ غاتا کمک اٹ ہڑتوم آ کنڈآتا میکانزم اس جوڑ کننگ و چاڈ انا ورناک سفارتکار آتے فارن سروس اکیڈمی، اسلام آباد اٹی تربیت نا چرجوئی ءِ برجاتخنگ آ امنا کریر۔
