اسلام آباد۔ 09 فروری (اے پی پی) وزیرخارجہ مخدوم شاہ محمود قریشی پارینے کہ پاکستان بنگلہ دیش تون ہڑتوم آ کنڈآتا واپاری و اقتصادی تعلقداری تا مون آ دننگ نا خواہندار ءِ۔ داہیت ءِ او پاکستان اٹی تعینات بنگلہ دیش نا ہائی کمشنر روح العالم صدیقی تون گپ وتران کرسا پارے ہرا چارشنبے نادے آ وزارت خارجہ ٹی اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری ، تین پہ تینی است خواہی نا بشخ آتیٹی ہڑتوم آ کنڈآتا کمکاری نا مون آ دننگ تون اوار اہم امور آ گپ وتران کننگا۔ بنگلہ دیش نا ہائی کمشنر تینا سرکڑدہ نا کنڈآن پاکستانی سرکڑدہ غاتیکن خیرخواہی نا کلہو ءِ سرکرے۔ وزیر خارجہ پارے کہ پاکستان بنگلہ دیش تون ہڑتوم آ کنڈآتا تعلقداری ءِ خاص اہمیت ایتک ، ہڑتوم آ ملک آتا نیام اٹ ہڑتوم آ کنڈآتا تعلقداری اسہ وڑ عقیدہ و دودوربیدگ نا بنداو آٹو۔ شاہ محمود قریشی پارے کہ پاکستان اقتصادی اولیت و علاقائی رابطہ غاتے ودفنگ نا ایجنڈا غا عمل کننگ ءِ۔ اوپارے کہ پاکستان بنگلہ دیش تون ہڑتوم آ کنڈآتا واپاری و اقتصادی تعلقداری تا مون آ دننگ نا خواہندار ءِ۔ وزیرخارجہ پاکستان و بنگلہ دیش نا نیام اٹ ہڑتوم آ کنڈآتا تعلقداری نا سوگوی کن بڑزکو کہولی رابطہ غاتا مون آ دننگ نا گرج آ زور شاغا۔ پاکستان اٹی بنگلہ دیش نا ہائی کمشنر روح العالم صدیقی وزیرخارجہ نا منت واری ءِ ہرفسا ہڑتوم آ کنڈآتا تعلقداری تا سوگوی کن تینا پبی کوشست آتے کاریم اٹ اتنگ نا باور کرفے۔
