اسلام آباد۔ 09 فروری (اے پی پی) وزیراعظم نا خصوصی کمکار سیاسی ابلاغ ڈاکٹر شہباز گل پارینے کہ بلاول بھٹو زرداری سیاسی وڑاٹ چناسے، الس ہم اوڑآ مخنگ ءِ کہ و تینٹ سندھ حکومت اٹ تولوک ءِ و تحریک انصاف ءِ اسمبلی ءِ پرغنگ نا پاننگ ءِ، اونا بیان آمخی اسے ، بلاول ءِ اپوزیشن و حکومت ہڑتوم آتا چس ءِ ہلنگ نا عادت ءِ، اگہ اوٹی ہمت ارے تو اول سندھ اسمبلی ءِ پرغے ، ولدا لانگ مارچ اکن پیش تمے۔ چارشنبے نادے آ بلاول بھٹو نا بیان آ نجی ٹی وی چینل ءِ ردعمل ترسا اوپارے کہ بلاول بھٹو داسکان سیاسی ءُ چناسے ، او افواہ کننگ و غیر سنجیدہ ہیت کرسا کیک، وکٹ آک تحریک اںصاف نا آخا بلکن پیپلزپارٹی نا تمنگ نا بناءِ کرینو، منہ دے مست ہراتم سینیٹ اٹی اسٹیٹ بینک بل پاس کرفنگ کن پیش کننگا تو سینیٹ اٹی قائد حزب اختلاف سید یوسف رضاگیلانی بفرسا بل ءِ پاس کرفنگ اٹ حکومت نا کمک ءِ کرے۔ ڈاکٹر شہباز گل پارے کہ کنا بلاول ءِ کلہو ءِ کہ بسم اللہ کے، سندھ اسمبلی ءِ پرغے، استیفہ ایتے و ولدا لانگ مارچ اکن پیش تمے، دا تینٹ تو اپوزیشن و حکومت ہڑتوم آتا چس ءِ ہلنگ ءِ و ننے اسبملی ءِ پرغنگ نا پاننگ ءِ۔ اوپارے کہ الس بلاول نا بیان آ مخنگ ءِ کہ تینٹ اوار اپوزیشن و حکومت نا چس ءِ ہلنگ ءِ و ایلوفتے اسمبلی ءِ پرغنگ نا پاننگ ءِ ، الس چاہک کہ اونا ہچءُ کاز اس اف، دافک مدام جند انافائدہ غاتے اولیت تسنو۔
