اسلام آباد۔ 09 فروری(اے پی پی) وزیرخارجہ مخدوم شاہ محمود قریشی بھارتی ریاستی کرناٹک اٹی پیش بروک آ واقعہ نا ترندی اٹ مذمت ءِ کرسا پارینے کہ ننا گڑتی داسہ مقبوضہ جموں وکشمیر اسکان محدود سلتنے، کرناٹک نا واقعہ دانا پیدوار شاہدی اسے۔ چارشنبے نادے آ بی جے پی سرکار نا ناروا پالیسی تا سوب آن ڈیہہ نا امن ءِ مون تروک خطرہ غاتا بابت اسہ بیان اسے ٹی وزیرخارجہ پارے کہ مقبوضہ جموں وکشمیر اٹی برجاانسانی حق انا بھلا خلاف ورزی و ظلم انا کنڈآنن جہانی برادری نا چکار ءِ پدریسہ کرفسا بننگ اُن وخت اس کہ وزیراعظم خان وار وار آ پارینے کہ ننے اسلاموفوبیا نا ودوک آ کچ آ بھاز گڑتی ءِ۔ اوپارے کہ نیامے ٹی اڈ ہلوک، او آئی سی وزراء خارجہ کونسل نا چِل و ہفت می دیوان اٹی پاکستان نئے بیرہ اسلاموفوبیا نا ودوک آ کچ انا برخلاف توار بڑز کرے بلکن اسلاموفوبیا نا برخلاف امنائی وڑاٹ منظور مروک آ قرارداد ہم پاکستان پیش کرے۔ ننا گڑتیک اینو حقیقت اس مننگ ءُ، کرناٹک نا واقعہ دانا پیدوار شاہدی ءِ۔ ایون دنیا خننگ ءِ کہ ہندوستان اٹی حجاب نا پن آ مسن تے تعلیم نا زیور آن محروم کننگ انگ ءِ۔ شاہ محمود قریشی پارے کہ ہندوستان اٹی اقلیت آتون پدریسہ ناروا سلوک کننگ انگ ءِ ہرا است ہسونی نا سوب ءِ۔ ہندوستان اسہ کنڈآ تینے سیکولر ازم و جمہوریت نا خواجہ پارفک و ایلو کنڈآ لویس آ پابندی خلنگ انگ ءِ۔ وزیرخارجہ پارے کہ ہندوستان اٹی کروڑ آ مسلمان رہینگ انگ ءُ، ننا تینا اسہ تمدن اسے و اسہ تہذیب اسے۔ درو ہرا کرناٹک اٹی مسنے او ہندوستان اٹی رہینگوک آ کروڑ آ مسلمان تے سرفنگ کن گنج اسے۔ اوڈبنگوک ضرور اریر ولے اگہ ڈبنگسا خاموش ہم مسر تو ظلم انا چرجوئی بند مفک۔ شاہ محمود قریشی پارے کہ اودے تینا بنداوی انسانی حق انا رکھ اکن سلوئی مریک۔ اوپارے کہ ای کرناٹک اٹی پیش بروک آ واقعہ نا ترندی اٹ مذمت ءِ کیوہ۔ ای اینو انسانی حق انا علمبردار تنظیم تا چکار ءِ کرناٹک اٹی پیش بروک آ است ہسون واقعہ نا کنڈآ کرفنگ خواوہ، اینو چپ سلپبو ہندوستان اٹی خوانوک آ ہموچناتیکن توار بڑزکیر ہرافتیان تعلیم نا دوئی کننگ نا حق ءِ پُلنگ انگ ءِ۔ ای ہندوستان اٹی رہینگوک آ سیکولر سوچ تخوک تپہ غاتے ہم پاوہ کہ او تینا ملک انا تشخص ءِ بچفنگ کن مسلم اقلیت تون مروک آ ناروا سلوک نابرخلاف توار بڑز کیر۔ شاہ محمود قریشی پارے کہ انشاء اللہ 22/23مارچ آ اسلام آباد اٹی او آئی سی وزراء خارجہ کونسل نا چل ءُ ہشت می دیوان اڈ ہلیک۔ دادیوان اٹی فلسطین نا ویل، کشمیر ناویل، اسلاموفوبیا تون اوار مسلم امہ ءِ مون تروک چیلنج آتیا شرہ مریک۔ ننے داہم ہروئی ءِ کہ نن مسلمان تا حق انا رکھ اکن او آئی سی نا پلیٹ فارم ءِ ہراوڑ گچین وڑ اٹ کاریم اٹ اتنگ کینہ۔
