اسلام آباد۔ 09 فروری (اے پی پی) وزیر مملکت حوالکاری و شینکاری فرخ حبیب پارینے کہ پی ٹی آئی فارن فنڈنگ کیس اٹ غٹ تر ریکارڈ جمع کرفے و باقاعدگی اٹ الیکشن کمیشن نا مون آ پیش مرسا کرینے۔ ننا الیکشن کمیشن آن ہم خواست ءِ کہ ن لیگ و پیپلزپارٹی نا فارن فنڈنگ نا جاچ اکن سکروٹنی کمیٹی ءِ فعال کننگے، بلاول و مریم ءِ ہم تینا تینا پارٹی فنڈنگ نا بارواٹ پاروئی مریک، ن لیگ و پیپلزپارٹی پیشن نا ملک پارٹی ءِ لمیٹڈ کمپنی نا وڑاٹ رجسٹرڈ کرفینو، مارک سہگل ہرامد اٹ زرترسا کننگا۔ چارشنبے نادے آ الیکشن کمیشن نا پیشن میڈیا تون گپ وتران کرسا وزیر مملکت فرخ حبیب پارے کہ اینو ولدا نن الیکشن کمیشن آن خواست کرینن کہ پیپلزپارٹی و ن لیگ فارن فنڈنگ نا بابت سکروٹنی کمیٹی ءِ فعال کننگتنے، اسہ باسک اسے نا ریٹائرڈ مننگ نا سوب آن سکروٹنی کمیٹی غیر فعال ءِ۔ اوپارے کہ ن لیگ 64 کروڑ و پیپلزپارٹی 35 کروڑ نا حساب ءِ تننگ کتور، ن لیگ نا 9 و پیپلزپارٹی نا 12 اودیم اکاؤنٹ مون آ بسنو، ننا موقف و خواست ءِ کہ غٹ سیاسی جماعت آتا اکاؤنٹ آتا جاچ پڑتال مرے۔ الیکشن کمیشن ءِ فیصلہ کروئی ءِ ، ننا خواست ءِ کہ زوت فیصلہ کننگے۔ وزیر مملکت فرخ حبیب پارے کہ ن لیگ و پیپلزپارٹی نا کوشست مریک کہ وڑانا وڑاسے ٹی کانود نا بالادستی نا مون آ اڑاند اس بش کیر، داعادت ءِ ہلوئی تمک، اسہ کنڈآ 22 سال انا جہد ءِ تو ایلو کنڈآ کرپشن ءِ، اسہ ایلو ءِ سلیکٹڈ پاننگ و سڑک آتا گِرنگ نا ہیت کروک آک تینا دُزی تے ڈکھنگ کن یکجا مریرہ۔ اوپارے کہ عمران خان پاکستان نا تاریخ نا غٹ آن بھلا جان جوڑی اصلاحات پروگرام اس اتسا بسنے، اینو فیصل آباد ڈویژن نا 32 لکھ خاہوت آتیکن جان جوڑی انصاف کارڈ نا بنامننگ والا ءِ۔
