اسلام آباد۔ 09 فروری (اے پی پی) وزیرداخلہ شیخ رشید احمد پارینے کہ اپوزیشن بے پتی نا شوق ءِ پورو کے اوفتا سیاست 50 دے اکن رہینگانے، 50 دے آن پد وزیراعظم عمران خان پین سوگو مریک، مولانا فضل الرحمان نا سیاست جتا و پیپلزپارٹی و ن لیگ نا سیاست جتاءِ، مچ آ اپوزیشن نا کسر جتا جتا ءُ، اپوزیشن وزیراعظم نا دورہ چین آن پد مشکل آتا گواچی ءِ، 22 سال آن پد وزیراعظم روس انا دورہ غا ہِننگ ءِ وخت اس کہ ایرانی وزیرداخلہ 14 فروری آ پاکستان نا دورہ غا بننگ ءِ، اسلام آباد اٹی پولیس نا موبائل سروس نا بناءِ کننگانے، نادرا نا دفترآتا دنگ ءِ مرمرانگا علاقہ غاتسکان ودفنگ اُن، حکومت ایف سی و رینجرآتا تنخواہ تیٹی 15 درسد ودکی نا فیصلہ کرینن۔ چارشنبے نادے آ نیشنل پولیس اکیڈمی پولیس لائنز اسلام آباد اٹی بورڈ میٹنگ آن پد میڈیا تون گپ وتران کرسا وزیرداخلہ پارے کہ 14 فروری آ ایرانی وزیرداخلہ پاکستا ن آ بننگ ءِ، 22 سال آن پد پاکستان نا وزیراعظم روس نا دورہ ءِ کننگ کن ہِننگ ءِ، آسٹریلوی کرکٹ ٹیم ہم پاکستان نا دورہ غا بننگ ءِ۔ اوپارے کہ مولانا فضل الرحمان نا سیاست جتا و پیپلزپارٹی و ن لیگ نا سیاست جتا ءِ، مچ آ اپوزیشن نا کسر جتا جتا ءِ، دافک ننا سیوتی تیان کمک خواہنگ ءُ، کنے دافک 23 مار چ آہم اسلام آباد آ برسا نظر بفننگ ءُ ، دا غٹ ٹی وی ٹی وی ءِ ہُننگ ءُ، اوفتیان اَریفیوہ کہ اوفتے انت اس ہلنگ کن اسلام آباد آ بروئی ءِ۔ شیخ رشید احمد پارے کہ اپوزیشن نا پڈاٹی مروڑ تننگ ءِ، بے پتی اتنگ نا دعویٰ کروک آک اتسا نشان ایتر، اوفتے شکست مریک، اپوزیشن داڑے غٹ ٹی وی ٹی گوازی کننگ ءُ ، دافک بے پتی اتنگ کن بندغ اتنگ کپسہ، مارچ اٹ دیر اسے اتیرہ، اپوزیشن تینا چارپائی نا کیرغ آن جارو خلے، تینا بندغ آتے پورو کے، اوفتا سیاست 50 دے اکن رہینگانے، 50 دے آن پد وزیراعظم عمران خان پین سوگو مریک، بروک آ 50 دے پاکستانی سیاست کن اہم ءُ، اپوزیشن ءِ سماتمک، عمران خان سرسہب مریک انتئے کہ اوڑتون گچین سلہہ دیانتداری نا ءِ۔ وزیرداخلہ شیخ رشید احمد پارے کہ وزیراعظم عمران خان کرپشن نا برخلاف ءِ و وزیراعظم کس اسے این آر اوتفک ، مخلوق نا پلوک آ پیسہ غاتے پدی ایتے۔ اوپارے کہ وزیراعظم عمران خان غٹ رینجرز و ایف سی نا تنخواہ تیٹی 15 درسد نا ودکی نا فیصلہ کرینے، وزیراعظم آن ایلو بشخ آتیٹی ہم تنخواہ تے ودفنگ نا خواست کرینن۔ اسہ سوج اسے نا ورندی ٹی اوپارے کہ شاری تا جان و مال انا رکھ اکن پولیس نا موبائل سروس بناکرینے، اوغانستان تینا گل زمین ءِ پاکستان نا برخلاف کاریم اٹ اتپننگ نا باور کرفینے۔ اسہ سوج اسے نا ورندی ٹی وزیرداخلہ پارے کہ شہباز شریف و حمزہ شہباز نا کرپشن نا کیس آک زیات سوگو ءُ و شہباز شریف نواز شریف آن ہم زیات کرپٹ ءِ۔ نیب اتون کرپشن نا 70 میگا کیس ءُ۔ اوپارے کہ فیصل واڈا الیکشن کمیشن نا فیصلہ نا برخلاف سپریم کورٹ آ کاہک۔ اوپارے کہ نادرا نا دفتر آتا دنگ و مر مر انگا علاقہ غاتسکان ودفنگ اُن، 13 پاسپورٹ نا دفترسندھ اٹی ملنگ انگ ءِ، بلوچستان و آزاد کشمیر اٹی میراتی سرٹیفکیٹ تننگ والا اُن۔
