اسلام آباد۔ 09 فروری (اے پی پی) چین پاکستان اقتصادی راہداری (سی پیک) نا رداٹ بڑزکو آب انا شونداری کن اسہ پیدوار سمت اسے نا تعین کننگانے، ہڑتوم آ سنگت ہمسایہ ملک آتا سرکڑدہ غاتا راہشونی ٹی سی پیک نا ارٹ میکو ریسہ غان صنعت، انفارمیشن ٹیکنالوجی و کشت وکشار نا بشخ آتیٹی گیشتر رفت نا گمان آک بناکرینو۔ سی پیک اتھارٹی کمامدارآتارداٹ ہشت سال مست صدر شی جن پنگ اولیکو وار ’’بیلٹ اینڈ روڈ‘‘ انیشی ایٹیو نا سلاہ پیش کریسس، و سی پیک ءِ ’’بیلٹ اینڈ روڈ‘‘ نا رداٹ اسہ بے مٹ ڈٹ اسے نا وڑاٹ پاکستان اٹ جم وجوش اٹ بناکننگا۔ اولی دے آن صدر شی جن پنگ سی پیک نا تفنگ ءِ بھاز اہمیت تسنے و پاکسان راہشون آتون اوڑدہی کننگ نا ہرموقع غا او چین پاک اقتصادی راہداری نا تفنگ ءِ بڑزکو آب اتون مون آ دننگ نا گرج آ زور شاغانے ، تانکہ سی پیک ءِ ’’بیلٹ اینڈ روڈ‘‘ نا بڑزکو آب انا اسیجائی تفنگ نا اسہ اہم ءُ بے مٹ ءُ ڈٹ اس کننگے۔ داسکان سی پیک نا اولیکو ریسہ نا تفنگ نا نتیجہ خیز بھرم دوئی مسنے۔ بجلی نا فراوانی تون اوار توانائی نا چندی ڈٹ آتا پوروی آن پد اونا نمان اثرمون آ بننگ بناکرینے، ہراپاکستان اٹ کیہی سال آتیان برجا بجلی نا کاختی نا سوب آن ودی مروک آ راجی و اقتصادی ویل آتے بھلو حداسسکان چٹفینے۔ لائٹ ریل ریلوائی نا باضابطہ بنا و انٹرسٹی ایکسپریس وے تون اوار ٹرانسپورٹیشن نا بنداوی پنجر نا تفنگ آن ہن و بر ءِ مون تروک ویل آتیٹی بھلو حداسسکان گچینی بسنے و پاکستان نا اقتصادی انفراسٹرکچر نا جدید کاری ءِ بھاز مون آ دننگانے۔ داڑتون اوار اوار سی پیک نا ڈٹ آتا تعمیراتی عمل اٹی ہندی مخلوق کن روزگار نا خاطرخواہ وارخواہی فراوان کننگانے۔
