بلوچستان ءَ  اینکاس دیمروئی  دیاں کہ کشاں چیل ءِ ودی کنوک آنی گپ ءَ کس گوش نہ دار ایت، مزن وزیر  ءِ نوشکی ءَ گشتانک، ناشرکاری ءِ مقابلی ءَ قربانی  دیوکیں  ورنا آناں   توسیپ ءُ ستا  پیش  کت، ایف سی ءُ ریجنرز آنی پگار ءَ 15  درسد  گیشی ءِ  جار

نوشکی ۔8فروری  (اے پی پی): مزن وزیر عمران خان ءَ نوشکی ءَ ناشرکاری ءِ  مقابلہ  ءَ کنان ءَ قربان  دیوکیں  ورنا آناں توسیپ ءُ ستا پیش کنان ءَ گوشت کہ  سرجمیں  راج ءَ را وتی درلیں ارد ءِ سر ءَ پھر انت  کہ ناشرکار اچبر کامیات نہ بنت، بلوچستان ءَ  اینکیاس دیمروئی کنت کہ  کشاں چیل ءِ شنگ ءُ تالان کنوک آنی گپ ءَ اچ کس گوش نہ دار ایت۔   سی پیک ءِ  دومی  فیز ءَ صنعتی دیمروئی،  ٹیکنالوجی  ءِ ٹرانسفر ،  انفارمیشن   ٹیکنالوجی ءُ کشت ءُ کشار ءِ پیداوار  ءِ ودینگ ءِ سر ءَ ھاسیں دلگوشی  کنگ بیت۔ اے ھیالانی درشانی آئی ءَ سئے شمبے ءَ نوشکی  ءَ ورنا آں گوں گشتانک دیان ءَ کت۔  اے موہ ءِ سر ءَ پاک فوج ءِ سروک جنرل قمر جاوید باجوہ،  گورنر  ءُ سر وزیر  بلوچستان،  بنجاھی  وزیر تہی کار شیخ رشید احمد، بنجاھی وزیر اھوالکاری ءُ شنگ کاری چوہدری فواد حسین، ڈپٹی سپیکر راجی اسمبلی قاسم خان سوری ءُ ایندگر  ھم ساڑی اتنت۔  مزن وزیر ءَ گوشت کہ ناشرکار آنی کامیاتی  ءَ گوں مقابلی کنوکیں ورنا آناں توسیپ ءُ ستا  پیش کناں۔  آءیءَ گوشت کہ  سرجمیں راج  وتی دلیریں  ارد ءِ  گوما ھمگام ءَ اوشتاتگ۔  مزن وزیر ءَ اے موہ ءِ سر ءَ ایف سی   ءُ ریجنرز  ءِ پگار آنی  تہ ءَ 15 درسد گیشی ءِجار جت ءُ گوشت کہ پاکستان   ھم سرجمیں دگنیا ءِ وڑ ءَ  گران بھائی ءِ  آچ ءَ سُچگ ءَ  انت،  امریکا  ءُ  برطانیہ  وڑیں ملک ءَ را ھم گوستگیں 40 سال آنی  ساھت ءَ  درستاں چہ گیش  گران بھائی ءِ گوما دیم  پہ دیمی انت۔  من زاناں کہ  مئے پگار   گروکیں مردم سک بزگ انت۔ منی سرجمیں کوشست انت کہ   ملک ءَ معاشی جاور ھا انچوش بہ بنت کہ آمدن ءِ تہ ءَ گیشی بہ بیت ءُ ما پگار  گروک آناں ریلیف   دات بہ کناں۔   آئی ءَ گوشت کہ ناشرکار آنی  پشت ءَ  ھما مردم  انت کہ آ پاکستان ءَ را  ٹکر ٹکر کنگ لوٹاں،    ایشی ءِ واستہ  دگہ جاہے ءَ  چہ  فنڈنگ   کنگ بوھگ ءَ انت،  ما صوبگ ءَ را  اینکیاس دیمروئی دیاں کہ   ڈن ملک ءَ نندان ءَ   دژمنیں ملک آنی  لیکہ  ءَ چہ  جنگ ءُ چوپ ءَ را   شنگ ءُ تالان کنگ ءَ انت۔   ایشانی اچ گپ گوش دارگ نہ بیت۔  مزن وزیر ءَ گوشت کہ سی پیک ءِ دومی  فیز ءَ بلوچستان ءَ را ھاسیں رنگ ءَ سیت بوتگ۔ چینی صدر  ءَ   دل یکیمی  داستگ کہ سی پیک ءِ دومی فیز ءَ ٹیکنالوجی  ٹرانسفر، انفارمیشن ٹیکنالوجی، کشت ءُ کشار   ءَ را ودینگ ءُ انڈسٹریلائیزیشن ءِ سر ءَ  ھاسیں دلگوشی کنگ بیت۔