پاکستان وچین نا تعلقداری آن مچ آ ڈیہہ ٹی سوگوی بسنے، بھارت کشمیر نا حالیت آتے بدتر کرینے، بھارت نا انتہاپسند حکومت تون مون آ ہِننگ بھاز مشکل ءِ، وزیراعظم عمران خان

اسلام آباد۔ 08 فروری (اے پی پی) وزیراعظم عمران خان پارینے کہ پاکستان و چین نا تعلقداری آن مچ آ ڈیہہ ٹی سوگوی بسنے، بھارت کشمیر نا حالیت آتے بدترکرینے، بھارت نا انتہاپسند حکومت تون مون آ ہِننگ بھاز مشکل ءِ، طالبان حکومت تون پسندیدگی و نا پسندیدگی ءِ اسہ کنڈآ تخسا نن اوغان الس نا بایدے کمک ءِ کین، الس ءِ نیزگاری آن کشنگ کن چین ننا رول ماڈل ءِ، دنیا اسہ پین سرد جنگ اسے سگنگ کپک، داوڑنا حالیت بایدے ودی مف کہ دنیا اِرا بشخ آتیٹی بشخنگے۔ داخیال آتا درشانی ءِ او چینی ٹی وی ’سی جی ٹی این‘ ءِ انٹرویو ترسا کرے۔ وزیراعظم پارے کہ ای تینا زند انا 20 سال ءِ جہانی گوازی تیٹی بشخ ہلنگ اٹ گدریفیٹ، ہراتم آن ای وزیراعظم مسونٹ کنے ٹی وی آ ہم گوازی تا مقابلہ ءِ ہُننگ نا موقع کم ملک۔ اوپارے کہ بیجنگ اٹی سرمائی اولمپکس ءِ ہُننگ کنکن خوشی نا سوب ءِ۔ اسہ سوج اسے نا ورندی ٹی اوپارے کہ پاکستان و چین نا تعلقداری ہندن یکتا ءُ ہراوخت انا ہرآزمائشت آ پورو سلرہ۔ پاکستان و چین ہرامشکل آتیٹی گدریفیر ننا تعلقداری ہر امتحان اٹ سرسہب مس و وخت اتون سوگو مرسا ہنار۔ اوپارے کہ سی پیک صدر شی جن پنگ نا بیلٹ اینڈ روڈ ڈٹ انا اہم انگا جزو ءِ۔ کنا خیال ءِ کہ ہراتم ای وزیراعظم لی و صدر شی جن پنگ تون ملیوہ تو اوفتے پاوہ کہ دادے پین مون آ دننگے۔ دا مواصلاتی رابطہ و توانائی نا پیدواری ڈٹ آتیان بناکرے۔ داسہ نن دا خوانہ کہ دا بروک آ ریسہ نا کنڈآ کائے ہرا صنعتی شونداری، انفارمیشن ٹیکنالوجی و غٹ آن زیات کشت وکشار نا بشخ آ تالان ءِ انتئے کہ کشت وکشار ننا ملک انا اہم انگا بشخ ءِ۔ ننے تینا ودوک آ آبادی کن غذائی رکھ انا گرج ءِ۔ داخاطرآن بھاز المی ءِ کہ ننے تینا کشاری پیدوار ءِ ودفنگ اٹ چین نا کمک دوئی مرے۔ اسہ سوج اسے نا ورندی ٹی اوپارے کہ کنا خیال اٹی پاکستان و چین نا تعلقداری آن مچ آ ڈیہہ ٹی سوگوی بسنے۔ بدبختی اٹ داوخت آ پاکستان نا غٹ آن بھلا ویل ہراحداسسکان چین نا ویل ہم ارے او ننا بھلا ہمسایہ بھارت  ءِ، ای مخلوق اسے آن اُٹ ہرا دا پکا یخین تخیوہ۔ نن تینا غٹ اختلاف آتے بایدے گپ وتران اٹ ایسر کین ولے دا بدبختی ءِ کہ بھارت اٹ اسہ انتہاپسند قوم پرست حکومت اسے۔ 74 سال مست ننا آجوئی نا وخت آن وخت اس ہم بھارت اٹی دُن ءُ حکومت اس متنے، دا ننا بدبختی ءِ کہ ننے دا بھاز مشکل محسوس مریک کہ نن دا حکومت تون امر مون آ کان۔ خاص وڑاٹ کشمیر نا سوب آن ، کشمیر بھارت تون ننا اسٹ انگا تنازع ءِ۔ ای اومیت کیوہ کہ زوت یا ہرے نن دادے گپ وتران نا کمک اٹ ایسر کینہ۔ اگہ دادے اسہ کنڈآ تخسا ہرن تو چین و پاکستان نا تعلقداری ڈیہہ ٹی سوگوی ایسونے۔ اوغانستان نا بابت سوج انا ورندی ٹی اوپارے کہ پاکستان و چین نا نیام اٹ داہیت آ امنائی ءِ کہ اسہ قوم اس ہم داخہ مصیبت ہلتنےاخس کہ اوغان الس، او40 سال اسکان ہرااسٹ انگا گڑ اءِ خنانو او جنگ ءِ۔ دااولیکو وار ءِ کہ ہموڑے امن نا موقع دوبسنے انتئے کہ اوغانستان اٹی داوخت آ ہچ ءُ جنگ اس مفننگ ءِ ولے داوخت آ ویل ہموڑے بھاز بھلو انسانی المیہ نا رونما مننگ نا ءِ انتئے کہ اوغانستان نا سیبو پیشن نا امداد آ مسنے۔ طالبان نا حکومت سنبھالنگ اسکان اوغانستان نا بجٹ نا 70 درسد بشخ پیشن نا امداد آ ئسک۔ اسہ وار ہراتم پیشن نا امداد چٹاتو مچ آ حکومت اسہ تشویشناک تنکی سے نا گواچی ءِ۔ اوخذمت فراوان کننگ کپک انتئے کہ اوڑتون پیسہ ہی اف و اونا زرمبادلہ نا کوڑی تے منجمد کننگانے۔ چین و پاکستان و بھاز انگا ایلو ملک آک حتیٰ کہ یورپی ملک آک غٹ انا امنا ءِ کہ وڑاناوڑاسے ٹی طالبان تا حکومت ءِ پسندیدگی یاناپسندیدگی ءِ اسہ کنڈآ تخسا ہرااسٹ انگا گڑا ننا ذہن تیٹی مرے او 4 کروڑ اوغان الس ءِ ہرافتیان نیمہ غذائی بے رکھ انا بدترین حالیت آتا گواچی ءُ۔ ہموڑے قحط بین آن مرک و غذائی کمتی نا گمان ءِ۔ ہنداخاطرآن ننا اتفاق ءِ کہ ہر اسٹ نا اولیت اوغانستان نا 4 کروڑ الس مرے۔ سی پیک نا بابت اسہ سوج اسے نا ورندی ٹی وزیراعظم پارے کہ دا ڈٹ بھاز اہم ءِ انتئے کہ چین نا زرکاری رابطہ استوار کننگ و توانائی نا پیدوار نا بشخ آتیٹی ہندن ءُ وخت اسے ٹی بس ہرا پاکستان کن بھاز نازرک ئس انتئے کہ ننے اِراوڑنا ویل مون تروک ئس، اسٹ تو نن دہشت گردی نا برخلاف جنگ اٹی شریک ئسن و دہشت گردی نا برخلاف جنگ اٹی پاکستان نا مروک آ نسخان شاید پین ملک اسے آن زیات ئس۔ اوغانستان آن بیدس پاکستان پین ملک اسے آن زیات نسخان ہرفے۔ ننا کم و ود 80 ہزار مخلوق شہید مس و زرگزران ءِ 100 ارب ڈالر آن زیات نا نسخان مس۔ ننا کرنسی تینا نیمہ غان زیات نہاد ءِ گوہاو داغٹ آن زیات ننا اِرا تہائی بدعنوان حکومت آک ہرا مالی تنکی نا سوب جوڑ مسر ہنداخاطرآن چین ننا غٹ آن مشکل وخت اٹی مون آ بس، داہم او سوب آتیان اسٹ ءِ ہرانا سوب پاکستان اٹ چین نا الس کن داخہ در مہرومریبت ءِ انتئے کہ گرج انا وخت کاریم بروک آ سنگت ءِ نم مدام یات تخرے۔ داسہ سی پیک ارٹ میکو ریسہ نا کنڈآہِننگ ءِ و ارٹ میکو ریسہ ٹی اولیکو گڑاتو ننا صنعتی زون اٹی زرکاری ءِ، ارٹ میکو انفارمیشن ٹیکنالوجی ٹی ۔ وزیراعظم پارے کہ پاکستان تینا ٹیکنالوجی زون اٹی زرکاری کن زبردست آسودہی تننگ ءِ و مسٹ میکو گڑا ہرانا ای مہالو ہم ذکر ءِ کریٹ او کشت وکشار ءِ انتئے کہ پاکستان بنداوی وڑاٹ اسہ کشاری ءُ ملک اسے و ننے کشت وکشار اٹی پیدوار ءِ ودفنگ کن چین نا کمکاری و مدت نا گرج ءِ۔ نن مہالو آن چین نا کمپنی تتون مفاہمت نا یات داشت آتیا دستخط کننگ اُن ہرا تین پہ تینی وڑاٹ مفید مریک۔ چینی کمپنی تے ننا داڑے زرکاری آن بھاز فائدہ مریک و پاکستان کن ٹیکنالوجی نا گدریفنگ فائدہ مند مریک۔ وزیراعظم پارے کہ سی پیک نا ڈٹ داسہ ارٹ میکو ریسہ ٹی پترینگانے۔ اسہ سوج اسے نا ورندی ٹی اوپارے کہ ہراتم آن کنا حکومت برسر اقتدار بسنے، پاکستان جیو اکنامکس آ خاص چکار کرینے۔ داتم اسکان نن جیو اکنامکس نا مقابلہ ٹی جیو سٹریٹجک ءِ اہمیت تسن۔ جیو اکنامکس آن مراد کنا حکومت نا اولیت مخلوق ءِ نیزگاری آن کشنگ ءِ۔ بدبختی اٹ ننا 25 درسد آبادی نیزگاری نا لکیر آن شیف زند ءِ تیر کننگ ءُ۔ ننا بنداوی اولیت اوفتے دا حالیت آتیان پیشن کشنگ ءِ و دابابت چین ننا رول ماڈل ءِ۔ وزیراعظم پارے کہ انسانی تاریخ اٹ اسہ ملک اس ہم داخہ کم مداٹی داخہ مخلوق ءِ نیزگاری آن کشتنے اخس کہ چین کشانے۔