اسلام آباد۔ 08 فروری (اے پی پی) صدر آزاد کشمیر بیرسٹر سلطان محمود چوہدری پارینے کہ سوگو پاکستان کشمیر نا بھارتی کوزہ غان آجوئی نا ضامن ءِ، وزیراعظم عمران خان نا کماشی ٹی پاکستان کشمیر نا ویل ءِ جہانی کہول آ پگی وڑاٹ تالان کرے۔ اومیت ءِ پاکستان بروک آ تُو اسلام آباد اٹی اسلامی کمکار تنظیم (او آئی سی) نا وزراء خارجہ نا دیوان اٹی کشمیر نا ویل ءِ پبی و گچین وڑاٹ ہرفک، کشمیری راہشون تتون سلابت و آل پارٹیز کانفرنس نا فیصلہ نا رداٹ 24 فروری آ اسلام آباد اٹی اسہ بھلو کشمیر ریلی اس اڈتننگک۔ داخیال آتا درشانی ءِ او قومی خبررساں ادارہ ’’اے پی پی‘‘ ءِ خصوصی انٹرویو ٹی کرے۔ اوپارے کہ مقبوضہ کشمیر اٹی کودک شاری تیا ظلم بھارت نا دروشم آ بدنما ءُداغ اسے ، ہندو توا سوچ آ عمل نا سوب آن بھارت مچ آ دنیا ٹی بے نقاب مسنے، مودی نا کماشی ٹی بھارتی حکومت 5 اگست 2019 آ کشمیرنا خصوصی حیثیت ءِ چٹفسا ہندن ءُ ناپاک گام گیج کرینے ہرافتا مسخت مقبوضہ کشمیر اٹی حق خودارادیت کن برجاالسی جہد ءِ توننگ و مسلمان تا آبادی نا کچ ءِ بدل کننگ ءِ۔ آزاد جموں وکشمیر نا صدر پارے کہ بھارت مقبوضہ علاقہ ٹی حریت کانفرنس نا مچ آ سرکڑدہ غاتے زندان تیٹی بند کرینے، سید علی گیلانی و محمد اشرف صحرائی نظربندی ٹی حراست اٹی شہید مسر۔ بیرسٹر سلطان محمود چوہدری پارے کہ بھارتی حکومت نا 5 اگست نا گام آ حکومت پاکستان و وزیراعظم عمران خان شدید ردعمل ظاہر کرے، وزیراعظم پاکستان تینٹ آزاد کشمیر اسمبلی آ بس و او دوٹوک پڑو کرے کہ ای کشمیر نا سفیر جوڑ مریوہ و دنیا نا ہر فورم آ کشمیر نا ویل ءِ ہرفیوہ۔ اوپارے کہ وزیراعظم عمران خان اقوام متحدہ نا جنرل اسمبلی نا دیوان آن تران و پیشن نا ملک آتا دورہ غاتے ٹی کشمیر نا ویل ءِ پبی وڑاٹ ہرفے، وزیراعظم چین نا ساڑی آ دورہ ٹی ہم کشمیر ناویل ءِ تالان کرے و چین نا سرکڑدہ غاتون داویل آ ہیت کرے۔ بیرسٹر سلطان محمود چوہدری پارے کہ بھارت مقبوضہ کشمیر اٹی ظلم و بربریت اٹ ودکی کرینے۔ صدر ریاست نا زمواری ءِ پورو کرسا کشمیر نا ویل ءِ مہالو ہم پبی وڑاٹ تالان کرے، آخبت ہم گچین کوشست آتا گرج ءِ، نن کشمیر ءِ جہانی فورم تیا جارحانہ وڑاٹ ہرفنگ نا فیصلہ کرینن۔ صدر آزاد کشمیر پارے کہ کشمیر نا ویل ءِ جہانی کہول آ تالان کننگ کن آل پارٹیز کانفرنس نا فیصلہ و کشمیری راہشون تتون سلابت آن پد بنجائی دارالحکومت اسلام آباد اٹی 24 فروری آ اسہ بھلو ریلی اس اڈتننگ انگءِ ، ریلی نا بنادے انا 11 ءُ نیم بجہ غا نیشنل پریس کلب اسلام آباد آن مریک ہراٹی آزاد جموں و کشمیر نا دینی و سیاسی جماعت آتا سرکڑدہ غاتیان بیدس حریت کانفرنس نا راہشون تتون اوار کشمیری تا اسہ بھلو کچ اس بشخ ہلیک، ریلی ڈی چوک آ ایسر مریک ہراڑے کشمیری سرکڑدہ غاک ریلی ٹی بشخ ہلوک آتیان تران کیرہ، دا ریلی ٹی زند انا چندی بشخ آتیان تعلق تخوک آ مخلوق آک بشخ ہلیرہ۔ اوپارے کہ کشمیر نا ویل ءِ جہانی کہول آ تالان کننگ و مقبوضہ کشمیر اٹی بھارت نا بدترین ریاستی دہشت گردی ءِ بے نقاب کننگ کن آل پارٹیز کانفرنس نا فیصلہ نا رداٹ کشمیری راہشون تتون سلابت آن پد ریلی نا اڈتننگ نا فیصلہ ءِ کننگانے۔ بیرسٹر سلطان محمو د چوہدری پارے کہ بھارت نا 5 اگست نا غیرکانودی گام آن پد دفترخارجہ نا کوشست آتیان اقوام متحدہ نا سلامتی کونسل اٹ 3 وار کشمیر نا ویل آ شرہ مس و اقوام متحدہ نا سیکرٹری جنرل پارے کہ کشمیر نا بارواٹ سلامتی کونسل نا قرارداد آک داسہ ہم گچین ءُ۔ اوپارے کہ نن جہانی کہول آ کشمیری الس نا حق خودارادیت نا بارواٹ مہالو ہم پبی مہم چلیفسا کرینن و آخبت ہم دا چرجوئی ءِ برجاتخنہ، اکتوبر 2021اٹی یورپ اٹی کشمیری تا حق اٹ 4 بھلو مچی برسلز، ہیگ، لندن و پیرس اٹی کریر، 26 اکتوبر آ برطانوی پارلیمنٹ اٹ کشمیر نا بارواٹ حوال نا بست وبند کرے ہراٹی 45 پارلیمنٹ باسک ساڑی ئسر ہرافک باوری کرفینو کہ او برطانوی وزیراعظم و وزیرخارجہ غا زور شاغک کہ او کشمیر نا ویل ءِ ایسر کرفنگ کن تینا اثرورسوخ ءِ کاریم اٹ اتے۔ صدر آزاد کشمیر پارے کہ بھارتی حکومت مقبوضہ کشمیر اٹی مسلمان تا آبادی نا کچ ءِ بدل کننگ آ عمل کننگ ءِ و او داتم اسکان لکھ آ ہندو باتی تے ہندی ڈومیسائل جاری کرینے، اسمبیل حلقہ غاتا پوسکن آ حدبندینا کمک اٹ او مقبوضہ کشمیر اٹی ہندووزیراعلیٰ مسلط کننگ خواہک۔ اوپارے کہ کشمیری پردیسی تا سوب آن کشمیر نا ویل جہانی کہول آ تالان مننگ ءِ، آل پارٹیز کانفرنس دافیصلہ ہم کرینے کہ اسلام آباد و مظفرآباد آن بیدس برسلز یا لندن اٹ جہانی کشمیر کانفرنس اڈتننگک۔
