لانگ مارچ اپوزیشن نا سیاسی گرج ءِ، داتینا فائدہ غاتا رکھ اکن یکجا مسنو، وزیرخارجہ مخدوم شاہ محمود قریشی نا اپوزیشن نا لانگ مارچ انا بابت بیان

اسلام آباد۔ 07 فروری (اے پی پی) وزیرخارجہ مخدوم شاہ محمود قریشی پارینے کہ لانگ مارچ اپوزیشن نا سیاسی گرج ءِ، داتینا فائدہ غاتا رکھ اکن یکجا مسنو اوفتا نظریہ و سوچ اسٹ اف، ہراتم فائدہ غاک پورو مسر تو جتا مریرہ۔ دوشنبے نادے آ اپوزیشن نا لانگ مارچ انا بابت اسہ بیان اسے ٹی وزیرخارجہ پارے کہ اپوزیشن برانز کننگ خواہک تو ضرور کے ننے ہچ ءُ اعتراض اس اف ، ننے ہچ ءُ خلیس اس اف ولے اپوزیشن ملکی فائدہ غاتے مون آ تخے۔ قوم چاہک پی ڈی ایم ءِ جوڑ کروک آک دیر ئسر و پی ڈی ایم ءِ پرغوک آک دیر ءُ۔ شاہ محمود قریشی پارے کہ اول دوتے مون آ کننگا ولدا دوتے پدی کننگا، قائد حزب اختلاف نا اسہ سیٹ اسے کن درو دیر اس کرے؟ قوم غٹ ءِ چاہک۔ اوپارے کہ 22 و 23 مارچ آ اسہ آ اسہ پوسکن ءُ تاریخ اس نوشتہ مننگ والا ءِ ، او آئی سی وزراء خارجہ کونسل نا چل ءُ ہشت ممی دیوان اسلام آباد اٹی مننگ والا ءِ ہراٹی اوغانستان، فلسطین، اسلام فوبیا تون اوار مسلم امہ ءِ مون تروک ویل آتیا گپ وتران مریک۔ اوپارے کہ پاکستان نا سرسہب خارجہ پالیسی نا بارواٹ ای پاپرہ دنیا پاہک ، راہول گاندھی ءِ بنبو او تینا لوک سبھا نا تقریراٹی بی جے پی سرکار ءِ پیدوار پارے کہ نی تو پاکستان ءِ سفارتی پڑآ تنیا کننگ کن پیش تماسس و تینٹ تنیائی نا گواچی مسوس۔ شاہ محمو دقریشی پارے کہ ای شہباز شریف و بلاول بھٹو زرداری آن سوج کننگ خواوہ کہ انت داڑے نی، ایڑے نن نا فیصلہ مسنے، ؟ تاثردا مون آ بننگ ءِ کہ ن لیگ سندھ اٹی پترینگپک و پی پی پنجاب اٹی چھیڑچھاڑی کپک۔ اوپارے کہ اگہ داہڑتوم آ جماعت آک ’’داڑے نی ایڑے نن‘‘ نا فیصلہ کریر تو نن ہڑتوم آ جماعت آتا مقابلہ ءِ کینہ۔