اسلام آباد۔ 07 فروری (اے پی پی) روشن ڈیجیٹل اکاؤنٹس آن زررادہ کننگ نا کچ 3.4 ارب ڈالر اسکان سرمس۔ اسٹیٹ بینک انا کنڈآن دا بابت جاری کروک حساب وکتاب نا رداٹ جنوری نا ایسر اسکان روشن ڈیجیٹل اکاؤنٹ آتا کمک اٹ زررادہ کننگ و کھاتہ غاتا کچ 3.4 ارب ڈالراسکان سرمسنے۔ جنوری 2022اٹی روشن ڈیجیٹل اکاؤنٹس نا کمک اٹ 222 ملین ڈالر نا زررادہ کننگ ریکارڈ کننگا ہرا دسمبر 2021نا مقابلہ ٹی کم ءُ، دسمبر اٹی روشن ڈیجیٹل اکاؤنٹس نا کمک اٹ زررادہ کننگ نا کچ 244 ملین ڈالر ریکارڈ کننگاسس، تدوک آ مالی سال انا آخیریکو تُو یعنی جون اٹی آرڈی اے نا کمک اٹ زررادہ کننگ نا کچ 310 ملین ڈالر ریکارڈ کننگاسس ۔ حکومت اسٹیٹ بینک و کمرشل بینک آتا کمک اٹ سمندر پار پاکستانی تیکن دا ڈٹ انا بناءِ کرینے ہرانا بھاز جوان ءُ بھرم اس مون آ بننگ ءِ۔ دااسکیم نا کمک اٹ سمندر پار پاکستانی تے ملک اٹی بینکنگ و زرکاری نا سرجزآتیٹی زرتس کن گچین ءُ پلیٹ فارم اس تننگانے۔ داتم اسکان 175 ملک آتیٹی 322463 آن زیات اکاؤنٹ ملانے۔ نومبر نا ایسر آ آرڈی اے اکاؤنٹس آتا کچ 299،676 ئس ہرا دسمبر 2021اٹی 322،463 مس۔
