پاکستان و اوغانستان نا آخبت اسہ ایلو تون وابستہ ءِ، بنجائی وزیر مذہبی امور نا مسلم ہینڈز نا کنڈآن کمکی گڑااوغانستان آ روانہ کننگ نا وخت آ دود آن تران

اسلام آباد۔ 07 فروری (اے پی پی) بنجائی وزیر مذہبی امور پیر نور الحق قادری پارینے کہ پاکستان و اوغانستان نا آخبت اسہ ایلو تون وابستہ ءِ، اوغانستان نا برخلاف ہیت کروک آ پاکستان نا دشمن ءِ و اوغانستان نا ڈغار آ تولسا پاکستان نا برخلاف کارروائی کروک آک اوغانستان نا خیر خواہ مننگ کپسہ، وزیراعظم عمران خان نا دورہ چین نا ایجنڈا ٹی اوغانستان نا حالیت آک سرفہرست ئسر، وزیراعظم اوغانستان کن او آئی سی نا پلیٹ فارم ءِ متحرک کرسا تاریخی ءُ گام اس کرینے۔ دوشنبے نادے آ داڑے مسلم ہینڈز نا کنڈآن اوغان الس نا ریلیف کن 20 ٹرک آتیا تالان کمکی گڑاتا قافلہ نا روانگی نا وخت آ گپ وتران کرسا اوپارے کہ اوغان الس کن 20 ٹرک آتیا تالان انسانی امداد مسلم ہینڈز نا کنڈآن پوسکن ءُ ہیت اس اف۔ اومدام اوغانستان اٹ ہروخت آ کمکی سرجزآتے برجاتخانے۔ اوپارے کہ اوغانستان نا حالیت آک بے کچ ناگفتہ بہ ءُ و ننا برادر اسلامی ملک اسہ پین المیہ سے نا کنڈآ ہِننگ ءِ۔ اوغانستان اٹی ہراڑے دنیا نا ایلو ادارہ غاک کمکی کارروائی تیٹی لگوک ءُ ہموڑے مسلم ہینڈز ہم تینا کڑد ءِ ادا کننگ ءِ۔ اواومیت ظاہر کرے کہ ایلو جہانی این جی اوز و رفاہ عامہ نا ادارہ غاک ہم داچرجوئی ٹی تینا پبی کڑد ءِ ادا کیرہ۔ اوپارے کہ پاکستان نا الس خواہک کہ اوغانستان تون ننا دیرینہ و تاریخی رابطہ مدام برجاسلے انتئے کہ اوغانستان اسہ وتواجہ و آجو ءُ ملک اسے۔ او تینا تشخص آ ہچ ءُ سمجھوتہ اس کننگ کپک۔ اوپارے کہ وزیراعظم عمران خان نا دورہ چین نا وخت آ اوغانستان نا حالیت اولین ایجنڈا ئسک کہ ہراوڑ اوغانستان ءِ المیہ غان بچفنگے۔ وزیر مذہبی امور پارے کہ اوغانستان نا پاکستان تون و پاکستان نا اوغانستان تون آخبت وابستہ ءِ ، ہرکس کہ اوغانستان نا برخلاف ہیت کیک نن اودے تینا دشمن تکنہ۔ و ہرا اوغانستان اٹی تولسا پاکستان نا برخلاف ہیت کیک او اوغانستان نا خیر خواہ مننگ کپک۔ اوپارے کہ اوغانستان کن وزیراعظم عمران خان او آئی سی نا پلیٹ فارم ءِ متحرک کرسا تاریخی ءُ کڑد اس ادا کرینے۔ اوغانستان نا حالیت آتیا پاکستان اٹی اسہ پین او آئی سی کانفرنس اس اڈتننگ والا ءِ۔ مسلم ہینڈ نا چیئرمین سید لخت حسنین، پارلیمنٹ نا باسک آک و ایلو پنی آ شخصیت آک ہم داوخت آ ساڑی ئسر۔