بیجنگ۔ 04 فروری (اے پی پی) وزیراعظم عمران خان چینی کارپوریٹ راہشون تے زرکاری کن سازگار چاگڑد اس ودی کننگ نا حکومتی گام گیج آتیان معلومدار کرسا سی پیک خصوصی اقتصادی زون تیٹی زرکاری کن کاروبار دوست پالیسی تیان فائدہ ہرفنگ نا ترغیب تسنے۔ جمعہ نادے آ وزیراعظم میڈیا آفس آن جاری بیان نا رداٹ وزیراعظم عمران خان بیجنگ اٹ چین نا سرکڑدہ سرکاری و نجی کمپنی راہشون آتون اوڑدہی کرے۔ اوڑدہی کروک آتیٹی چائنا کمیونیکیشن کنسٹرکشن کمپنی، ہاؤزانگ ٹیکنالوجی ، زی جیانگ سی پورٹ پڑک، چیلنج فیشنز، ہونان سن واک پڑک، رائل پڑک، چائنا روڈ اینڈ برج کارپوریشن، زنگ بانگ پڑک و چائنا مشینری انجینئرنگ کارپوریشن نا بڑزکو کمامدارآک اوار ئسر۔ کارپوریٹ راہشونک وزیراعظم ءِ پاکستان اٹ تینا برجاڈٹ آتیا پیش رفت آن معلومدار کریر۔ اودھات و کاغد نا ری سائیکلنگ، توانائی، ٹیکسٹائل ، فائبر آپٹکس نیٹ ورکس، ہاؤسنگ، ڈیری و واٹر مینجمنٹ نا بابت ڈٹ آتیٹی پاکستان اٹ زرکاری ءِ ودفنگ اٹ بھاز است خواہی ظاہر کریر ۔ چائنا کمیونیکیشن کنسٹرکشن کمپنی تعمیراتی و بنداوی پنجر نا شونداری کن کاریم کیک۔ ہاؤزانگ ٹیکنالوجی مربوط کاغد سازی نا گڑاتیٹی مہارت تخک۔ زی جیانگ سی پورٹ پڑک چین نا غٹ آن بھلا پورٹ آپریٹرآتیان اسٹ ءِ۔ چیلنج فیشنز اسہ پنی ءُ ٹیکسٹائل کمپنی اسے۔ ہونان سن واک پڑک نا بنداوی کاروبار مواصلات، تھری ڈی پرنٹنگ و تعمیرات ءِ۔ رائل پڑک چین نا غٹ آن بھلا میئی نا پال ودی کروک آ غٹ آن بھلا پڑک ءِ۔ چائنا روڈ اینڈ برج کارپوریشن سول انجینئرنگ و تعمیراتی ڈٹ آتیا کاریم کیک۔ زنگ بانگ پڑک صوبہ جیان زی نا بھلا کشاری انٹرپرائز ءِ و چائنا مشینری انجینئرنگ کارپوریشن چین نا بھلا کشاری صنعتی مشینری کمپنی تیان اسٹ ءِ۔ داوخت آ وزیراعظم عمران خان چینی کمپنی تا پاکستان اٹ زرکاری ٹی است خواہی نا ستاءِ کرے۔ اوہڑتوم آ ملک آتا نیام اٹ اقتصادی و واپاری تعلقداری تے تالان کرسا چینی کارپوریٹ راہشون تے پاکستان اٹ چینی زرکاری کن سازگار چاگڑد اس ودی کننگ نا بابت کروک آ گام گیج آتیان معلومدار کرے و اوفتے سی پیک خصوصی اقتصادی زون تیٹی زرکاری کن کاروبار دوست پالیسی تیان فائدہ ہرفنگ نا ترغیب تس۔ داوخت آ وزیراعظم تون اوار بنجائی وزیر آک، سلاہکار و بڑزکو کمامدارآک ہم ئسر۔
